ജീവിതത്തിന്റെ അവസാന കാലത്ത് ഒറ്റക്കായിപ്പോയ അമ്മമാര്ക്ക് സ്നേഹവും സംരക്ഷണവുമേകുകയാണ് റസിയ ബാനു എന്ന പാലക്കാട്ടുകാരി. 24 അമ്മമാരാണ് ഇപ്പോള് റസിയ നടത്തുന്ന ശാന്തിനികേതന് എന്ന വൃദ്ധസദനത്തിലുള്ളത്. യാതൊരു ലാഭവും പ്രതീക്ഷിക്കാതെയാണ് റസിയ ഈ അമ്മമാര്ക്ക് വേണ്ടി സേവനം നടത്തുന്നത്.
ശാന്തിനികേതനിലുള്ള ഓരോ അമ്മമാര്ക്കും ജീവിതത്തില് ഒറ്റപ്പെട്ടുപോയതിന്റെ കഥ പറയാനുണ്ട്. തളര്ന്നു വീണപ്പോള് അവര്ക്ക് കൈത്താങ്ങായി നിന്നത് റസിയബാനു എന്ന ഈ യുവതിയാണ്. ശാന്തിനികേതന് ഇവര്ക്ക് ഒരു വൃദ്ധസദനമല്ല മറിച്ച് അവരുടെ വീടാണ്, റസിയ അവരുടെ മകളും, ഇരുപത്തിനാല് അമ്മമാരുടെ മകള്.
2006ലാണ് അമ്മമാരെ സംരക്ഷിക്കണം എന്ന ചിന്തയിലൂടെ നഴ്സ് ആയ റസിയ ഒരു വീട് വാടകക്കെടുത്ത് വൃദ്ധസദനം ആരംഭിക്കുന്നത്. പിന്നീടുള്ള വര്ഷങ്ങള് റസിയ തന്റെ ജീവിതം ഈ അമ്മമാര്ക്കായി സമര്പ്പിക്കുകയായിരുന്നു. ഇന്ന് സ്വന്തമായി ഒരു കെട്ടിടം ശാന്തിനികേതനുണ്ട്.
വയസാകുന്ന അമ്മമാരെ തെരുവിലെറിയുന്ന ഈ കാലഘട്ടത്തില് യാതൊരു ലാഭവും പ്രതീക്ഷിക്കാതെ അവരെ ഏറ്റെടുത്ത് സംരക്ഷിക്കുന്ന റസിയയുടെ ജീവിതം ഒരു മാതൃക തന്നെയാണ്.
