Special

ലോകത്തിലെ അവസാന ആൺ വടക്കൻ വെള്ളക്കാണ്ടാമൃഗം യാത്രയായി : ഇനി അവശേഷിക്കുന്നത് നജിനും ഫാതുവും മാത്രം

നെയ്‌റോബി :വടക്കൻ വെള്ളക്കാണ്ടാമൃഗങ്ങളിൽ അവസാനത്തെ ആണായിരുന്ന സുഡാൻ കെനിയയിലെ മൃഗശാലയിൽ മരിച്ചു. നാൽപ്പത്തഞ്ചു വയസുള്ള സുഡാനെ പ്രായാധിക്യത്തിന്റെ അവശതയെത്തുടർന്ന് ദയാവധത്തിനു വിധേയനാക്കുകയായിരുന്നു. ഇനി ഈ വിഭാഗത്തിൽ രണ്ട് ‌പെൺ കാണ്ടാമൃഗങ്ങൾ മാത്രമാണ് ബാക്കിയുള്ളത്.നജിനും ഫാതുവും.

കാണ്ടാമൃഗ വേട്ടക്കാരുടെ നിരന്തരമായ വേട്ടയാടൽ കൊണ്ട്‌ ഇല്ലാതായ വിഭാഗമാണ് വടക്കൻ വെള്ളക്കാണ്ടാമൃഗം . വംശനാശം നേരിട്ടുകൊണ്ടിരിക്കുന്ന ഈ സ്പീഷീസിലെ അവസാന ആൺതരിയായിരുന്നു സുഡാൻ. . കെനിയയിലെ ഒപജേറ്റ വന്യജീവി സങ്കേതത്തിലായിരുന്നു സുഡാന്റെ വാസം . 24 മണിക്കൂറും  സായുധരായ കാവൽക്കാരുടെ നിരീക്ഷണത്തിലായിരുന്നു ഇവൻ.

ദിവസവും ആയിരക്കണക്കിനു സന്ദർശകരായിരുന്നു സുഡാനെ കാണാനെത്തിയിരുന്നത് . ഡേറ്റിംഗ് ആപ്പിൽ ഒരിക്കൽ ഏറ്റവും യോഗ്യതയുള്ള അവിവാഹിതൻ എന്ന സ്ഥാനം നേടിയിരുന്നു. 2009 ൽ ചെക്ക് റിപ്പബ്ളിക്കിൽ നിന്നാണ് സുഡാനും മറ്റ് രണ്ട് പെൺ കാണ്ടാമൃഗങ്ങളും കെനിയ മൃഗശാലയിലെത്തിയത്.

ഛാഡ് ,സുഡാൻ , ഉഗാണ്ട , കോംഗോ എന്നിവിടങ്ങളിൽ ധാരാളമായി ഉണ്ടായിരുന്ന ഈ വർഗ്ഗം മേഖലയിലെ ആഭ്യന്തര പ്രശ്നങ്ങളിലും നിരന്തരമായ വേട്ടയാടലിലും പെട്ടാണ്‌ ഇല്ലാതായത് . സുഡാന്റെ മരണത്തോടെ ആൺ വെള്ളക്കാണ്ടാമൃഗം ഇല്ലാതാകുന്നത് മനുഷ്യന്റെ ക്രൂരതയുടെ ഉദാഹരണമാണെന്ന് ചൂണ്ടിക്കാണിക്കപ്പെടുന്നു.

സുഡാന്റെ ബീജം സൂക്ഷിച്ച് കൃത്രിമ ബീജസങ്കലനത്തിലൂടെ ഈ വംശത്തെ സംരക്ഷിക്കാനാണ് ശ്രമം . ഈ ശ്രമം നടപ്പിലായില്ലെങ്കിൽ ലോകത്തിലെ അവസാന ആൺ വെള്ളക്കാണ്ടാമൃഗമായിരിക്കും സുഡാൻ. ഫാതുവും നജിനും മരിക്കുന്നതോടെ ഈ വംശം ഭൂമിയിൽ നിന്ന് എന്നെന്നേക്കുമായി അപ്രത്യക്ഷമാകും.

924 Shares

Please scroll down for comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Close
Close