ഹൈദരാബാദ്: ഐ.പി.എല്ലില്‍ കിംഗ്‌സ് ഇലവന്‍ പഞ്ചാബിന്റെ കരുത്തുറ്റ ബാറ്റിംഗ് നിരയെ ബൗളിംഗ് മികവില്‍ മറികടന്ന് സണ്‍റൈസേഴ്‌സ് ഹൈദരാബാദ്. ബാറ്റിംഗ് ദുഷ്‌ക്കരമായ പിച്ചില്‍ 133 റണ്‍സ് വിജയലക്ഷ്യവുമായി ക്രീസിലെത്തിയ കിംഗ്‌സ് ഇലവന്‍ പഞ്ചാബ് 19.2 ഓവറില്‍ 119 റണ്‍സിന് ഓള്‍ ഔട്ടായി. ഭുവനേശ്വര്‍ കുമാറും ബില്ലി സ്റ്റാന്‍ലേക്കും ഇല്ലാതെയാണ് സണ്‍റൈസേഴ്‌സിന്റെ ഉജ്ജ്വല ജയം എന്നതും ശ്രദ്ധേയമാണ്. റഷീദ് ഖാന്‍, സന്ദീപ് ശര്‍മ്മ, ബേസില്‍ തമ്പി, ഷക്കീബ് അല്‍ ഹസന്‍ എന്നിവരുടെ മികവാണ് പഞ്ചാബിനെ തകര്‍ത്തത്.
ബൗളര്‍മാര്‍ക്ക് പിന്തുണ ലഭിച്ച പിച്ചില്‍ ലോകേഷ് രാഹുലും ക്രിസ് ഗെയിലും കരുതലോടെയാണ് തുടങ്ങിയത്. ഇരുവരും ചേര്‍ന്ന് 6.3 ഓവറില്‍ സ്‌കോര്‍ 50 കടത്തിയപ്പോള്‍ കാര്യങ്ങള്‍ പഞ്ചാബിന് അനുകൂലമായി നീങ്ങുമെന്ന് കരുതി. എന്നാല്‍ തൊട്ടടുത്ത ഓവറില്‍ 32 റണ്‍സെടുത്ത് നിന്ന രാഹുലിനെ റഷീദ്ഖാന്‍ ബൗള്‍ഡാക്കുമ്പോള്‍ ടീം സ്‌കോര്‍ 55 റണ്‍സ്. ഒന്‍പതാം ഓവറില്‍ 23 റണ്‍സെടുത്ത ക്രിസ് ഗെയിലിനെ ബേസില്‍ സ്വന്തം ബൗളിംഗില്‍ ക്യാച്ചെടുത്ത് പുറത്താക്കി. പിന്നീട് പഞ്ചാബിന്റെ തകര്‍ച്ചയായിരുന്നു. അവസാന ഓവറില്‍ അങ്കിത് രജ്പൂതിനെയും ബേസില്‍ പുറത്താക്കി. റഷീദ് ഖാന്‍ നാല് ഓവറില്‍ 19 റണ്‍സ് മാത്രം വഴങ്ങി മൂന്ന് വിക്കറ്റ് വീഴ്‌ത്തി. സന്ദീപ് ശര്‍മ്മ, ബേസില്‍ തമ്പി, ഷക്കീബ് അല്‍ ഹസന്‍ എന്നിവര്‍ക്ക് രണ്ട് വിക്കറ്റ് വീതം ലഭിച്ചു.
നേരത്തേ, ടോസ് നഷ്ടപ്പെട്ട് ആദ്യം ബാറ്റ് ചെയ്ത സണ്‍റൈസേഴ്‌സ് ഹൈദരാബാദ് നിശ്ചിത 20 ഓവറില്‍ ആറ് വിക്കറ്റ് നഷ്ടത്തില്‍ 132 റണ്‍സാണ് സ്‌കോര്‍ ചെയ്തത്.
54 റണ്‍സെടുത്ത മനീഷ് പാണ്ഡെയാണ് ടോപ് സ്‌കോറര്‍. ഷക്കീബ് അല്‍ ഹസന്‍ 28 ഉം യൂസുഫ് പഠാന്‍ 21 ഉം റണ്‍സെടുത്തു. ജയത്തോടെ 7കളികളില്‍ നിന്നും 10 പോയിന്റുമായി സണ്‍റൈസേഴ്‌സ് പട്ടികയില്‍ രണ്ടാമതായി.
