കണ്ണൂർ: ജപ്പാനിൽ ബുള്ളറ്റ് ട്രെയിൻ തട്ടി മരിച്ച ഇരിട്ടി പടിയൂർ സ്വദേശി വി. ദേവികയുടെ ചിതാഭസ്മം കുടുംബത്തിന് കൈമാറി. അഡ്വ. സജീവ് ജോസഫ് എംഎൽഎയുടെ നേതൃത്വത്തിലാണ് ചിതാഭസ്മം ബന്ധുക്കൾക്ക് കൈമാറിയത്.
ഇന്നലെ പുലർച്ചെ തിരുവനന്തപുരം വിമാനത്താവളത്തിലെത്തിച്ച ചിതാഭസ്മം നോർക്ക അധികൃതരുടെ നേതൃത്വത്തിൽ ട്രെയിൻ മാർഗം കണ്ണൂരിലെത്തിക്കുകയായിരുന്നു. തുടർന്ന് പടിയൂർ നെടിയോടിയിലെ വീട്ടിൽവെച്ച് ദേവികയുടെ പിതാവ് പ്രകാശൻ എംഎൽഎയിൽനിന്ന് ചിതാഭസ്മം ഏറ്റുവാങ്ങി. മാതാപിതാക്കളും കുടുംബാംഗങ്ങളും നാട്ടുകാരും ജനപ്രതിനിധികളും ചിതാഭസ്മത്തിൽ പുഷ്പാർച്ചന നടത്തി.
ജപ്പാനിലെ ഗിഫു പ്രവിശ്യയിലുള്ള കകമിഗാഹാരയിൽ സെപ്റ്റംബർ രണ്ടിനാണ് ദേവികയെ ബുള്ളറ്റ് ട്രെയിൻ തട്ടി മരിച്ച നിലയിൽ കണ്ടെത്തിയത്. മൃതദേഹം നാട്ടിലെത്തിക്കാൻ കഴിയാത്ത സാഹചര്യത്തിൽ ജപ്പാനിൽവെച്ചുതന്നെ സംസ്കാരച്ചടങ്ങുകൾ നടത്തുകയായിരുന്നു.
കുടുംബത്തിന്റെ അനുമതിയോടെ കേന്ദ്ര വിദേശകാര്യ മന്ത്രാലയം, ഇന്ത്യൻ എംബസി, ജപ്പാനിലെ മലയാളി സംഘടനാ പ്രതിനിധികൾ എന്നിവരുടെ സഹായത്തോടെയാണ് സംസ്കാരച്ചടങ്ങുകൾ പൂർത്തിയാക്കിയത്.
