മോസ്കോ: ലോകകപ്പ് ഫുട്ബോളില് ബ്രസീലും സ്വിറ്റ്സര്ലന്ഡും പ്രീക്വാര്ട്ടറില്. സെര്ബിയയെ ഏകപക്ഷീയമായ രണ്ട് ഗോളുകള്ക്ക് കീഴടക്കിയ ബ്രസീല് ഗ്രൂപ്പ് ജേതാക്കളായി. തുടക്കം മുതല് ആക്രമിച്ചു കളിച്ച ബ്രസിലിന്റെ മുന്നേറ്റത്തെ ചെറുക്കാന് പലപ്പോഴും സെര്ബിയയ്ക്കായില്ല. കളിയുടെ മുപ്പത്തിയാറാം മിനിറ്റില് പൗളിന്യോ ബ്രസീലിനെ മുന്നിലെത്തിച്ചു. സെര്ബിയന് ബോക്സിലേക്ക് കുട്ടീന്യോ നീട്ടി നല്കിയ പാസ് പൗളിന്യോ വലയിലെത്തിക്കുകയായിരുന്നു.
അറുപത്തിയെട്ടാം മിനിറ്റില് ലഭിച്ച കോര്ണര് ഹെഡറിലൂടെ വലയിലെത്തിച്ച് തിയാഗോ സില്വ വീണ്ടും ലീഡുയര്ത്തി. നെയ്മറിന്റെ കോര്ണര് കിക്കാണ് ഗോളിന് വഴിവച്ചത്. ഗോള് വീണതോടെ സെര്ബിയ പ്രത്യാക്രമണത്തിന് മുതിര്ന്നെങ്കിലും ഫിനിഷിംഗിലെ പിഴവ് ടീമിന് തിരിച്ചടിയായി.
ഒന്നിനെതിരെ രണ്ട് ഗോളിന്റെ ജയമുറപ്പിച്ച ഘട്ടത്തിലാണ് ഇഞ്ചുറി ടൈമിലെ പെനാല്റ്റിയിലൂടെ സ്വിറ്റ്സര്ലന്ഡിനെ കൊസ്റ്റ റിക്ക സമനിലയില് തളച്ചത്. ബ്രയ്ന് വെയ് ഡോയുടെ ഷോട്ട് പോസ്റ്റ് ബാറില് തട്ടി പുറത്തേക്ക് തെറിച്ചെങ്കിലും ഗോളി സൊമെറിന്റെ ദേഹത്ത് തട്ടി വലയില് കയറി. 31ാം മിനുറ്റില് ബ്ലെരിം സെമൈലി സ്വിസ് ടീമിനെ മുന്നിലെത്തിച്ചു. 56ാം മിനുറ്റില് കെന്ഡല് വാട്സണിലൂടെ കൊസ്റ്ററിക്ക തിരിച്ചടിച്ചു.
88ാം മിനുറ്റില് ഡ്രിമിക്ക് സ്വിറ്റ്സര്ലന്ഡിന് രണ്ടാം ഗോള് സമ്മാനിച്ചു. സ്വിസ് ടീം ജയമുറപ്പിച്ച ഘട്ടത്തിലാണ് മത്സരം തീരാന് നിമിഷങ്ങള് ബാക്കി നില്ക്കെ കൊസ്റ്റ റിക്കയുടെ സമനില ഗോള് പിറക്കുന്നത്. കോസ്റ്റ റിക്ക സമനിലയില് തളച്ചെങ്കിലും അഞ്ച് പോയിന്റുമായി സ്വിസ് ടീം രണ്ടാം സ്ഥാനത്തെത്തി. ഒരു ജയവും രണ്ട് സമനിലയുമാണ് ടീം നേടിയത്.
പ്രീക്വാര്ട്ടറില് ബ്രസീല് മെക്സിക്കോയേയും സ്വീഡന് സ്വിറ്റ്സര്ലന്ഡിനെയും നേരിടും.