നിരവധി ആരോഗ്യ ഗുണങ്ങള് അടങ്ങിയ പഴവര്ഗമാണ് മാതളനാരങ്ങ. രക്തം ഉണ്ടാവാന് ഇത്രയേറെ ഫലപ്രദമായ മറ്റൊരു പഴം ഇല്ലെന്നു തന്നെ പറയാം. ഹൃദയരോഗങ്ങളും ചില കാന്സറുകളും തടയാന് വേണ്ട പോഷകങ്ങള് വരെ മാതളജ്യൂസിലുടെ ലഭിക്കുമെന്ന് ഗവേഷകര് സാക്ഷ്യപ്പെടുത്തുന്നു.
* മാതളത്തിന്റെ ജ്യൂസ് രക്തത്തിലെ ഓക്സിജന്റെ അളവ് വര്ദ്ധിപ്പിക്കാനും കൊഴുപ്പ് അകറ്റാനും സഹായിക്കുന്നു. ഫ്രീ റാഡിക്കലുകളെ തടയുന്നതിനും മാതള ജ്യൂസ് നല്ലതാണ്. രക്തത്തില് ഓക്സിജന്റെ അളവ് കൂടുന്നതോടെ സ്വാഭാവികമായും രക്തചംക്രമണം കൂടുതല് കാര്യക്ഷമമാകുകയും ആരോഗ്യം വര്ദ്ധിക്കുകയും ചെയ്യും.
* വയറിളക്കം ഉള്ളപ്പോള് മാതളനാരങ്ങ കഴിക്കുന്നത് നല്ലതാണ്. മാതളത്തിന്റെ ജ്യൂസ് കുടിക്കുന്നത് ഛര്ദ്ദി ഉള്ളവര്ക്കും ഗുണം ചെയ്യും.
* ശരീരഭാരം കുറക്കാന് മാതളനാരങ്ങ സഹായകമാണ്.
* കാന്സര് ചികിത്സയായ കീമോ തെറാപ്പിക്കു വിധേയമാകുന്നവര് പതിവായി മാതളനാരങ്ങ കഴിക്കുന്നതു വളരെ നല്ലതാണ്. രക്തകോശങ്ങളുടെ എണ്ണം ആരോഗ്യകരമായ തോതില് നിലനിര്ത്താന് മാതളനാരങ്ങയ്ക്ക് അദ്ഭുതകരമായ ശേഷിയുണ്ട്. ഹീമോഗ്ലോബിന്റെ അളവു കൂട്ടാനും സഹായിക്കുന്നു.
* ഗര്ഭിണികള്ക്കും മാതളനാരങ്ങ ഉത്തമം. മാതളനാരങ്ങയിലടങ്ങിയിരിക്കുന്ന ഇരുമ്പ് അനീമിയ അഥവാ വിളര്ച്ച അകറ്റാന് ഫലപ്രദം. രക്തശുദ്ധീകരണത്തിനും നല്ലത്. ഗര്ഭസ്ഥശിശുവിന്റെ തലച്ചോറിന്റെ ആരോഗ്യം മെച്ചപ്പെടുത്തുന്നു. ഓര്മശക്തി മെച്ചപ്പെടുത്തുന്നതിനും നല്ലതാണ്.
* മാതളനാരങ്ങയിലടങ്ങിയിരിക്കുന്ന വിറ്റാമിന് സി പനി, ജലദോഷം എന്നിവയെ തടയാന് സഹായിക്കും. രോഗപ്രതിരോധശക്തി കൂട്ടുന്നു. വൈറസുകളെ തുരത്തുന്നു. ചുമ കുറയ്ക്കാനും മാതളനാരങ്ങയുടെ നീര് നല്ലതാണ്.
* സന്ധിവാതം മൂലമുളള വേദന കുറയ്ക്കാന് മാതളനാരങ്ങ ഫലപ്രദം. സന്ധികളില് എല്ലുമായി ബന്ധപ്പെട്ടു കാണപ്പെടുന്ന കാര്ട്ടിലേജ് കോശങ്ങളുടെ ആരോഗ്യത്തിന് മാതളനാരങ്ങയുടെ സത്തിനു കഴിവുളളതായി ഗവേഷകര് പറയുന്നു.
