പാലും പാലുല്പ്പന്നങ്ങളും നമുക്ക് ഏറെ പ്രിയപ്പെട്ടതാണ്. പനീര് പോഷകസമ്പുഷ്ടവും രുചികരവുമായ ഒരു പാലുല്പ്പന്നമാണ്. കാത്സ്യം, ഫോസ്ഫറസ്, വിറ്റമിന്സ്, മിനറല്സ് എന്നിങ്ങനെ ശരീരത്തിന്റെ വളര്ച്ചക്ക് സഹായിക്കുന്ന ധാരാളം ഘടകങ്ങള് പനീറില് അടങ്ങിയിരിക്കുന്നു. വളരെ പെട്ടന്ന് ഊര്ജം പ്രദാനം ചെയ്യുന്ന ഭക്ഷണം ആയത് കൊണ്ട് തന്നെ കഠിന വ്യായാമത്തില് ഏര്പ്പെടുന്ന കായികതാരങ്ങള്ക്ക് വ്യായാമത്തിന് ശേഷം കഴിക്കുന്ന ഭക്ഷണത്തില് പനീര് ഉള്പ്പെടുത്താവുന്നതാണ്. 100 ഗ്രാം പനീറില് 11 ഗ്രാം പ്രോട്ടീന് അടങ്ങിയിട്ടുണ്ട്.
എല്ലിന്റേയും പല്ലിന്റേയും വളര്ച്ചക്ക് പനീറിലെ കാത്സ്യം, ഫോസ്ഫറസ് എന്നിവ സഹായിക്കുന്നു. എല്ലിന് തേയ്മാനം സംഭവിക്കുന്ന ഓസ്റ്റിയോപൊറോസിസ് പോലുള്ള അസുഖങ്ങളെയും സന്ധിരോഗങ്ങളേയും ഒരു പരിധി വരെ തടയാന് പനീര് സഹായകമാണ്. മോണ രോഗങ്ങളേയും പല്ലിനുണ്ടാകുന്ന അസുഖങ്ങളേയും പനീറില് അടങ്ങിയിരിക്കുന്ന മിനറല്സ് പ്രതിരോധിക്കുന്നു.
പനീറില് ലാക്ടോസിന്റെ അളവ് കുറവായതിനാല് കുട്ടികളുടെ പല്ലിന് കേടുണ്ടാക്കുന്നില്ല. അതുപോലെ വിറ്റമിന് ഡി സമൃദ്ധമായതിനാല് പല്ലിനുണ്ടാകുന്ന പോടില് നിന്ന് രക്ഷനേടാം.
രോഗപ്രതിരോധശേഷി വര്ധിക്കാനും സഹായകരമാണ് പനീര്. പ്രായമായവരുടെ തൊലിയില് ഉണ്ടാക്കുന്ന ചുളിവുകള് മാറ്റുന്നതിനും തലമുടിയുടെ വളര്ച്ചക്കും പനീറിലെ വിറ്റമിന് ബി സഹായിക്കുന്നു.
ഗര്ഭിണികള്ക്ക് ആവശ്യമായ ജീവകം ബി കോംപ്ലക്സ് വെറ്റമിനുകളായ ഫോളേറ്റുകള് എന്നിവ പനീറില് ധാരാളമുണ്ട്.
പാചകം ചെയ്യാന് വളരെ എളുപ്പമാണ് എന്നുള്ളതാണ് പനീറിന്റെ ഏറ്റവും വലിയ പ്രത്യേകത. മാംസാഹാരം ശീലമാക്കിയവര്ക്കും ഇഷ്ടപ്പെടുന്ന ഒന്നാണിത്.
എങ്കിലും കൊഴുപ്പിന്റെ അംശം കൂടുതലായതിനാല് ഹൃദയസംബന്ധമായ അസുഖം ഉള്ളവരും അമിതവണ്ണം ഉള്ളവരും ശ്രദ്ധിച്ച് മാത്രം കഴിക്കുക. മാത്രമല്ല പൊട്ടാസ്യത്തേക്കാള് പനീറില് സോഡിയത്തിന്റെ അളവും കൂടുതലാണ്.