ഇന്ന് ലോക ഹൃദയാരോഗ്യദിനം. എന്റെ, നിങ്ങളുടെ, നമ്മുടെ ഹൃദയത്തിനുവേണ്ടി എന്നതാണ് വേള്ഡ് ഹാര്ട്ട് ഫെഡറേഷന്റെ ഇത്തവണത്തെ ഹൃദയ ദിന സന്ദേശം. ഹൃദയസംബന്ധമായ രോഗങ്ങളെപ്പറ്റി അവബോധം നല്കുന്നതിന്നായി ലോകാരോഗ്യ സംഘടനയും വേള്ഡ് ഹാര്ട്ട് ഫൗണ്ടേഷനും ചേര്ന്ന് 2000 മുതല് എല്ലാവര്ഷവും സെപ്തംബര് 29 ലോക ഹൃദയാരോഗ്യ ദിനമായി ആചരിക്കുന്നു.
ലോകത്ത് ഏറ്റവും കൂടുതല് ഹൃദ്രോഗികളുളള രാജ്യങ്ങളിലൊന്നാണ് ഇന്ത്യ. സംസ്ഥാനങ്ങളില് കേരളവും മുന്നിലുണ്ട്. അനാരോഗ്യകരമായ ഭക്ഷണ ശീലത്തോടോപ്പം ജീവിത ശൈലിയില് വന്ന അച്ചടക്കമില്ലായ്മയുമാണ് ഇതിനുകാരണമെന്നാണ് പഠനങ്ങള് വ്യക്തമാക്കുന്നത്. നമ്മുടെ ഹൃദയത്തിനു വേണ്ടി ആരോഗ്യകരമായ ഭക്ഷണ ശീലത്തോടൊപ്പം കൃത്യമായ വ്യായാമവും ശീലിക്കേണ്ടതുണ്ട്.
മദ്യപാനം,പുകവലി ലഹരി വസ്തുക്കള് തുടങ്ങിയവയെല്ലാം ഹൃദയാരോഗ്യത്തെ ദുര്ബലപ്പെടുത്തുന്നു. വ്യായാമം ശീലമാക്കുന്നതിനൊപ്പം പോഷക സമൃദ്ധമായ ഭക്ഷണവും കഴിക്കുന്നതിലൂടെയും ഹൃദയാരോഗ്യം സംരക്ഷിക്കാമെന്ന് വിദഗ്ധര് പറയുന്നു. എണ്ണമറ്റ രോഗങ്ങളിലേക്ക് നമ്മെ വലിച്ചിഴക്കുന്ന വ്യായാമരഹിതമായ ജീവിതത്തിനെതിരെ വിട്ടു വീഴ്ചയില്ലാത്ത സമരം പ്രഖ്യാപിച്ചിരിക്കുകയാണ് വേള്ഡ് ഹാര്ട്ട് ഫെഡറേഷനും ലോകാരോഗ്യ സംഘടനയും. എന്റെ നിങ്ങളുടെ നമ്മുടെ ഹൃദയത്തിനുവേണ്ടി എന്ന സന്ദേശവാക്യം അതുകൊണ്ട് തന്നെ നമുക്കും ഹൃദയത്തോട് ചേര്ത്തുവെക്കാം.