മുംബൈ: വെസ്റ്റ് ഇൻഡീസിനെതിരായ ശേഷിക്കുന്ന മൂന്ന് ഏകദിനങ്ങൾക്കുള്ള ഇന്ത്യൻ ടീമിൽ ഭുവനേശ്വർ കുമാറിനെയും ജസ്പ്രീത് ബൂമ്രയെയും ഉൾപ്പെടുത്തി. അതേസമയം മോശം പ്രകടനം കാഴ്ചവച്ച മുഹമമ്ദ് ഷമിയെ ടീമിൽ നിന്ന് ഒഴിവാക്കുകയും ചെയ്തു. ഷമിയെ കൂടാതെ യുവതാരം ഷാർദ്ദൂർ താക്കൂറിനെയും ടീമിൽ നിന്ന് ഒഴിവാക്കി.
വിൻഡീസിനെതിരായ ആദ്യ രണ്ട് മത്സരങ്ങളിൽ നിന്നായി ഷമി വഴങ്ങിയത് 140 റൺസാണ്. ഇതാണ് ഷമിയ്‌ക്ക് ടീമിന് പുറത്തേക്കുള്ള വഴിതുറന്നത്.
അഞ്ച് ഏകദിനങ്ങളുള്ള പരമ്പരയിൽ ആദ്യ മത്സരം ഇന്ത്യ ജയിക്കുകയും രണ്ടാം മത്സരം ടൈ ആവുകയും ചെയ്തിരുന്നു. ഒക്ടോബര് 27ന് പുണെയിലാണ് മൂന്നാം ഏകദിനം. നാലാം ഏകദിനം 29ന് മുംബൈയിലും പരമ്പരയിലെ അവസാന ഏകദിനം നവംബര്‍ ഒന്നിന് തിരുവനന്തപുരം കാര്യവട്ടം സ്പോർട്ട്സ് ഹബ്ബിലും നടക്കും.
