അബുദബി: അന്താരാഷ്‌ട്ര ഫുട്ബോളിൽ അർജന്റീനയുടെ സൂപ്പർ താരം ലയണൽ മെസിയെ മറികടന്ന് ഇന്ത്യൻ നായകൻ സുനിൽ ഛേത്രി. ദേശീയ ടീമിന് വേണ്ടി നിലവിൽ കളിക്കുന്ന താരങ്ങളുടെ പട്ടികയിലാണ് ഛേത്രി മെസിയെ മറികടന്ന് രണ്ടാം സ്ഥാനത്തെത്തിയത്. ഇനി മുന്നിലുള്ളത് പോർച്ചുഗൽ താരം ക്രിസ്റ്റ്യാനോ റൊണാൾഡോ മാത്രമാണ്.
ഏഷ്യൻ കപ്പ് ഫുട്ബോളിൽ തായ്ലൻഡിനെതിരായി ഇരട്ട ഗോൾ നേടിയതാണ് ഇന്ത്യൻ താരത്തെ പുതിയ നേട്ടത്തിലെത്തിച്ചത്. 67 ഗോളുകളാണ് ഛേത്രി ദേശീയ ടീമിന് വേണ്ടി നേടിയത്. 65 ഗോളാണ് മെസിക്കുള്ളത്. ഒന്നാം സ്ഥാനത്തുള്ള ക്രിസ്റ്റ്യാനോയ്‌ക്ക് 85 ഗോളുകളാണുള്ളത്.
സുനിൽ ഛേത്രി 105 മത്സരങ്ങളിൽ നിന്ന് 67 ഗോളുകൾ നേടിയപ്പോൾ മെസി 125 മത്സരങ്ങളിൽ നിന്നാണ് 65 ഗോൾ നേടിയത്. 154 മത്സരങ്ങളിൽ നിന്നാണ് ക്രിസ്റ്റ്യാനോ 85 ഗോൾ നേടിയത്.
അതേസമയം, ഏഷ്യൻ കപ്പ് ഫുട്ബോളിലെ ആദ്യ മത്സരത്തിൽ ഇന്ത്യക്ക് ജയം. തായ്ലൻഡിനെ ഒന്നിനെതിരെ നാല് ഗോളിനാണ് ഇന്ത്യ തകർത്തത്. നായകൻ സുനിൽ ഛേത്രിയുടെ ഇരട്ട ഗോൾ പ്രകടനമാണ് ഇന്ത്യക്ക് തകർപ്പൻ ജയമൊരുക്കിയത്. ഛേത്രിക്ക് പുറമെ അനിരുദ്ധ ഥാപ്പെയും ജെജെയുമാണ് ഇന്ത്യക്ക് വേണ്ടി ഗോൾ നേടിയത്.
