കൊച്ചി: പോർച്ചുഗീസുകാരനായ എഡ്യൂറഡോ മാന്വൽ മർട്ടിനോ ‘നെലോ’ വിൻഗാഡ കേരള ബ്ലാസ്റ്റേഴ്സിന്റെ പുതിയ കോച്ചായി ചുമതലയേറ്റു. 2019 മെയ് മാസം വരെയാണ് കാലാവധി.
1968 മുതൽ 1980 വരെ പോർച്ചുഗൽ കളിക്കാരനായിരുന്ന നേലോ വിൻഗാഡ ഇപ്പോൾ ലോകത്തിലെ ഏറ്റവും പരിചയ സമ്പന്നനായ പരിശീലകരിൽ ഒരാളാണ്.
പത്ത് രാജ്യങ്ങളിൽ നിന്നും ഇരുപതോളം ഫുട്ബോൾ ടീമുകളെ പരിശീലിപ്പിച്ചിട്ടുള്ള നെലോ വിൻഗാഡ ബ്ലാസ്റ്റേഴ്സിൽ എത്തുന്നതിനു മുൻപ് മലേഷ്യൻ ദേശീയ ടീമിന്റെ പ്രധാന പരിശീലകനായിരുന്നു. 1996ൽ എ.എഫ്.സി ഏഷ്യൻ കപ്പിൽ സൗദി അറേബ്യൻ നാഷണൽ ടീം കിരീടം നേടിയത് അദ്ദേഹത്തിന്റെ ശിക്ഷണത്തിലാണ്. 2003-2004ൽ ഈജിപ്ഷ്യൻ പ്രീമിയർ ലീഗിൽ സമാലക് എഫ് സിയെ ഒരു മത്സരം പോലും തൊല്കാതെ കിരീടമണിയിച്ചതും നെലോ വിൻഗാഡയുടെ പരിശീലന മികവായിരുന്നു.
തുടർന്ന് സൗദി ഈജിഷ്യൻ സൂപ്പർ കപ്പിലും, അറബ് ക്ലബ്ബ് ചാമ്പ്യൻഷിപ്പിലും ടീമിനെ വിജയിയാക്കുന്നതിൽ നിർണായക പങ്കു വഹിച്ചു. 2010ൽ എഫ്.സി സിയോളിനെ കൊറിയൻ ലീഗ് ചാംപ്യന്മാരാക്കിയതും അദ്ദേഹത്തിന്റെ മിടുക്കുതന്നെ.
ഫുട്ബോൾ ലോകത്ത് പ്രൊഫസർ എന്നറിയപ്പെടുന്ന വിൻഗാഡയുടെ കീഴിൽ പോർച്ചുഗീസ് അണ്ടർ 20 ടീം 1995ലെ ഫിഫ യൂത്ത് വെൽഡ് ചാംപ്യൻഷിപ്പിൽ മൂന്നാം സ്ഥാനത്ത് എത്തിയിട്ടുണ്ട്.
ഐ എസ് എലിൽ വരാനിരിക്കുന്ന മത്സരങ്ങൾക്കും സൂപ്പർ കപ്പിലും കേരളാ ബ്ലാസ്റ്റേഴ്സിന് പുത്തനുണർവ്വുനല്കാൻ നെലോയുടെ പരിചയസമ്പന്നത മുതൽ കൂട്ടാകുമെന്ന് ബ്ലാസ്റ്റേഴ്സ് സ്പോർട്സ് വെഞ്ചഴ്സ് ഡയറക്ടർ നിതിൻ കുക്റേജ അഭിപ്രായപ്പെട്ടു.
കേരളാ ബ്ലാസ്റ്റേഴ്സിന്റെ പ്രഗത്ഭരായ ഫുട്ബോൾ കളിക്കാരെ പരിശീലിപ്പിക്കാൻ അവസരം ലഭിച്ചതിൽ സന്തോഷിക്കുന്നു എന്ന് നെലോ വിൻഗാഡ പറഞ്ഞു
