പ്രണവ് മോഹൻലാലിനെ നായകനാക്കി അരുൺ ഗോപി അണിയിച്ചൊരുക്കുന്ന ഇരുപത്തിയൊന്നാം നൂറ്റാണ്ടിന്റെ ട്രെയിലർ പുറത്തിറങ്ങി. ഇരുവരുടെയും രണ്ടാമത്തെ ചിത്രമായ ഇരുപത്തിയൊന്നാം നൂറ്റാണ്ട് ടോമിച്ചൻ മുളകുപാടമാണ് നിർമ്മിക്കുന്നത്.
‘അപ്പന്റെ ചരിത്രം ആവർത്തിക്കാൻ വന്നതാണെങ്കിൽ ഇടം മാറിപ്പോയി’ എന്ന ഡയലോഗിന് ‘അപ്പന്റെ ചരിത്രം അപ്പന്’ എന്ന പ്രണവിന്റെ മറുപടിയാണ് ട്രെയിലറിന്റെ ഹൈലൈറ്റ്. പ്രണവിനെ കൂടാതെ മനോജ് കെ ജയൻ, കലാഭവൻ ഷാജോൺ തുടങ്ങിയവർ ട്രെയിലറിലെത്തുന്നുണ്ട്.
പുതുമുഖം സയ ആണ് ചിത്രത്തില് പ്രണവിന്റെ നായികയായി എത്തുന്നത്. ചിത്രത്തിന്റെ ടീസറും പോസ്റ്ററും സാമൂഹിക മാദ്ധ്യമങ്ങളിൽ വൈറലായിക്കഴിഞ്ഞിരുന്നു. നോട്ട് എ ഡോൺ സ്റ്റോറി എന്ന ടാഗ് ലൈനോടുകൂടി എത്തുന്ന ചിത്രം ഒരു ആക്ഷൻ എന്റർടൈനെർ ആകുമെന്നാണ് ഇപ്പോൾ പുറത്തുവരുന്ന റിപ്പോർട്ടുകൾ.
ജീത്തു ജോസഫ് സംവിധാനം ചെയ്ത ആഥിയായിരുന്നു പ്രണവിന്റെ ആദ്യ ചിത്രം. ദിലീപിനെ നായകനാക്കി അണിയിച്ചൊരുക്കിയ രാമലീലയായിരുന്നു അരുൺ ഗോപിയുടെ ആദ്യ ചിത്രം.