ന്യൂഡല്ഹി: ബ്രഹ്മോസ് മിസൈല് വ്യോമപതിപ്പിന്റെ പരീക്ഷണം വീണ്ടും നടത്താനൊരുങ്ങുന്നു. പാകിസ്ഥാനിലെ ബാലാകോട്ടില് സൈന്യം നടത്തിയതു പോലുള്ള പ്രതിരോധ ആക്രമണങ്ങള് ഭാവിയില് നടത്തേണ്ടി വന്നാല് അതിന് ഉപയോഗിക്കാനാകുമോ എന്ന് തെളിയിക്കുന്നതിനാണ് പരീക്ഷണം. വ്യോമസേനയുടെ നേതൃത്വത്തിലാണ് ഇത് നടത്തുന്നത്. റഷ്യന് നിര്മ്മിത സുഖോയ്-30 എംകെഐയില് നിന്നാകും പരീക്ഷണ വിക്ഷേപണം. ഇന്ത്യയുടെ അത്യന്താധുനിക പോര്വിമാനമാണ് സുഖോയ്-30 എംകെഐ. നേരത്തെയും സുഖോയ് വിമാനത്തില് നിന്നുള്ള ബ്രഹ്മോസ് പതിപ്പിന്റെ പരീക്ഷണം വിജയകരമായി നടത്തിയിരുന്നു. ഇന്ത്യ-റഷ്യ സംയുക്ത സംരംഭമാണ് ബ്രഹ്മോസ്.
290 കിലോമീറ്റര് ദൂരപരിധിയില് പ്രയോഗിക്കാന് ശേഷിയുള്ള ബ്രഹ്മോസ് മിസൈലാണ് ഇപ്പോള് പരീക്ഷിക്കാന് പോകുന്നത്. അടുത്ത ആഴ്ചയാകും പരീക്ഷണം. സുഖോയ് പോര്വിമാനത്തില് നിന്നും വിവിധ ഉയരങ്ങളില് വച്ച് വായുവില് നിന്നും ലക്ഷ്യസ്ഥാനത്തേക്ക് തൊടുക്കുന്ന പരീക്ഷണമായിരിക്കും നടക്കുക. നിലവില് രണ്ട് സുഖോയ് വിമാനങ്ങളിലാണ് സുഖോയ് ഘടിപ്പിച്ചിരിക്കുന്നത്. ഇത് 40ലേക്കുയര്ത്താനാണ് തീരുമാനം. 2020ഓടെ ബ്രഹ്മോസിനെ സുഖോയിയുമായി ബന്ധിപ്പിക്കാനുള്ള ശ്രമങ്ങള് പൂര്ത്തിയാകുമെന്നാണ് നിഗമനം.
ശബ്ദത്തിന്റെ 2.8 ഇരട്ടി വോഗത്തിലാണ് ബ്രഹ്മോസ് സഞ്ചരിക്കുന്നത്. കരയില് നിന്ന് തൊടുക്കാവുന്ന ബ്രഹ്മോസ് മിസൈലിന് 3.6 ടണ്ണാണ് ഭാരം. വായുവില് നിന്ന് തൊടുക്കാവുന്ന ബ്രഹ്മോസ് ക്രൂസ് മിസൈലിന് രണ്ടര ടണ് ഭാരമുണ്ട്. സുഖോയ് വിമാനങ്ങളില് ബ്രഹ്മോസ് സജ്ജമാകുന്നതോടെ ഇന്ത്യയുടെ വ്യോമാക്രമണ ശേഷിയും മികച്ചതാകും. അതിനാല് തന്നെ മറ്റ് ആയുധങ്ങളുടെ കൂടെ ബ്രഹ്മോസ് മിസൈലിനെ വഹിക്കാന് സുഖോയ്ക്ക് മാത്രമേ സാധിക്കു. 2016 മുതല് ഇതുമായി ബന്ധപ്പെട്ട് പരീക്ഷണങ്ങള് നടന്നു വരികയായിരുന്നു.