മുംബൈ: കേദാർ ജാദവിന്റെ ലോകകപ്പ് സ്വപ്നങ്ങൾക്ക് പുതുജീവൻ. ലോകകപ്പ് കളിക്കാൻ ജാദവ് പരിപൂർണ്ണ ആരോഗ്യം വീണ്ടെടുത്തതായി ചെന്നൈ സൂപ്പർ കിംഗ്സ് വൃത്തങ്ങൾ അറിയിച്ചു. ഐ പി എൽ മത്സരത്തിനിടെ ഫീൽഡ് ചെയ്യുമ്പോൾ പരിക്കേറ്റതോടെയായിരുന്നു കേദാർ ജാദവിന്റെ ലോകകപ്പ് സ്വപ്നങ്ങൾ ആശങ്കയിലായിരുന്നത്. തുടർന്ന് ഐ പി എല്ലിലെ അവസാന മത്സരങ്ങൾ അദ്ദേഹത്തിന് നഷ്ടമായിരുന്നു.
മെയ് 22ന് ഇന്ത്യൻ ടീം ലോകകപ്പ് മത്സരങ്ങൾക്കായി ഇംഗ്ലണ്ടിലേക്ക് യാത്ര തിരിക്കും. 25ന് ന്യൂസിലാൻഡുമായി ഇന്ത്യ ആദ്യ സന്നാഹ മത്സരം കളിക്കും. ഈ മത്സരത്തിൽ ജാദവിന് കളിക്കാനായേക്കും. ബാറ്റിംഗിലും ബൗളിങ്ങിലും ഫീൽഡിംഗിലും മികവ് പുലർത്തുന്ന കേദാർ ജാദവിനെ ഓൾ റൗണ്ടറായാണ് ഇന്ത്യ പരിഗണിക്കുന്നത്.
4 വര്ഷത്തെ കാത്തിരിപ്പിന് വിരാമമിട്ട് മെയ് 30-ന് ഇംഗ്ലണ്ടിലും വെയില്സിലുമായി നടക്കുന്ന ക്രിക്കറ്റ് ലോകകപ്പിന് തുടക്കമാകുകയാണ്. ജൂൺ അഞ്ചിന് ദക്ഷിണാഫ്രിക്കക്കെതിരെയാണ് ലോകകപ്പിൽ ഇന്ത്യയുടെ ആദ്യ മത്സരം.
ആവേശത്തിനും ആഘോഷങ്ങള്ക്കുമൊടുവില് ജൂലൈ 14-ന് നടക്കുന്ന കലാശപ്പോരാട്ടത്തില് ക്രിക്കറ്റ് ലോകത്തിന്റെ അമരക്കാര് ആരാകുമെന്ന് കാത്തിരുന്ന് കാണാം.