ലോകകപ്പിലെ നിർഭാഗ്യത്തിന്റെ മുഖമായി ദക്ഷിണാഫ്രിക്ക

ലോകകപ്പ് ക്രിക്കറ്റിലെ നിർഭാഗ്യത്തിന്റെ മുഖമാണ് ദക്ഷിണാഫ്രിക്കയുടേത്. 1992 ൽ ഓസ്ട്രേലിയയിൽ നടന്ന ലോകകപ്പിലാണ് പ്രോട്ടീസ് നിര ആദ്യമായി പോരാട്ടത്തിന് ഇറങ്ങിയത്. മിന്നും ജയങ്ങളുമായി വിസ്മയിപ്പിച്ച ദക്ഷിണാഫ്രിക്ക സെമി ഫൈനലിൽ കാലിടറി വീണു. ഇന്ത്യൻ ഉപഭൂഖണ്ഡത്തിൽ നടന്ന 1996 ലോകകപ്പിൽ പ്രോട്ടീസ് ക്വാർട്ടറിൽ പുറത്തായി.

ഏകദിന ക്രിക്കറ്റിൽ ഒട്ടേറെ മാറ്റങ്ങൾക്ക് സാക്ഷ്യം വഹിച്ച 1992 ലെ ലോകകപ്പ്. മഴ നിയമങ്ങളും വെളുത്ത പന്തും ഫ്ളെഡ് ലൈറ്റും കളിക്കാർക്ക് വർണക്കുപ്പായങ്ങളും ഏകദിന മത്സരത്തിന്റെ ചാരുതയായി മാറിയ അതേ ലോകകപ്പിലായിരുന്നു വർണവെറിയുടെ ഊരാക്കുടുക്ക് പിന്നിട്ട്, വിലക്കിന്റെ ചങ്ങലപൊട്ടിച്ച് ക്രിക്കറ്റിലേക്ക് ദക്ഷിണാഫ്രിക്ക കടന്നുവന്നത്.

ഓസ്ട്രേലിയയിലും ന്യൂസിലൻഡിലുമായി നടന്ന ബെൻസൻ ആന്റ് ഹെഡ്ജസ് ട്രോഫിക്കായി പോരാട്ടത്തിനിറങ്ങിയ കെപ്ലർ വെസ്സൽസും സംഘവും കരുത്തരായ ഓസ്ട്രേലിയയേയും പാകിസ്ഥാനെയും ഇന്ത്യയേയും വെസ്റ്റ് ഇൻഡീസിനെയും കീഴടക്കി സെമി ബർത്ത് ഉറപ്പിച്ചു. മഴ കളിച്ച സിഡ്നിയിലെ സെമിയിൽ ഇംഗ്ലണ്ടിനെ 45 ഓവറിൽ 252 റൺസിന് പിടിച്ചുകെട്ടിയ പ്രോട്ടീസ് നിരയ്‌ക്ക് ഫൈനൽ ബർത്ത് ഏറെ അകലെയായിരുന്നില്ല. കെപ്ളർ വെസ്സൽസും ആൻഡ്രു ഹഡ്സനും പീറ്റർ കേസ്റ്റണും ഹാൻസി ക്രോണ്യയും ജോണ്ടി റോഡ്സും ഉൾപ്പെട്ട ബാറ്റിംഗ് നിര ലക്ഷ്യത്തിലേക്ക് കുതിച്ചു.

വിജയലക്ഷ്യം 13 പന്തിൽ 22 റൺസായി ചുരുങ്ങിയപ്പോഴാണ് വില്ലനായി മഴയും മഴനിയമവുമെത്തിയത്. വിജയലക്ഷ്യം പുനർനിശ്ചയിച്ചു ഏഴ് പന്തിൽ 22 റൺസ്. ക്രീസിൽ ബ്രയാൻ മാക്മില്ലനും ഡേവിഡ് റിച്ചാർഡ്സനും. ആരാധകരെ ഞെട്ടിച്ച് വീണ്ടും ഒരിക്കൽകൂടി പുതുക്കിയ വിജയലക്ഷ്യം. ഒരു പന്തിൽ 22 റൺസ്. നിരാശരായി പ്രോട്ടീസ് നിര മടങ്ങി. ഇംഗ്ലണ്ട് ഫൈനലിലേക്ക്.

ഹാൻസി ക്രോണ്യയുടെ നേതൃത്വത്തിൽ 96 ലോകകപ്പിലും പ്രതീക്ഷയോടെയെത്തിയ ദക്ഷിണാഫ്രിക്കൻ നിര സെമി കാണാതെ മടങ്ങി. ഗാരി കേസ്റ്റണും ആൻഡ്രു ഹഡ്സനും ഡാരിൽ കള്ളിനനും അടങ്ങുന്ന ബാറ്റിംഗ് നിരയും ഷോൺ പൊള്ളോക്കും അലൻ ഡൊണാൾഡുംകോ പാറ്റ് സിംസും അടങ്ങുന്ന ബൗളിംഗ് നിരയും പ്രാഥമിക റൗണ്ടിൽ തകർത്ത് കളിച്ചപ്പോൾ ദക്ഷിണാഫ്രിക്ക അനായാസം ക്വാർട്ടറിലെത്തി. കറാച്ചിയിൽ നടന്ന ക്വാർട്ടർ പോരാട്ടത്തിൽ ബ്രയാൻ ലാറയുടെ സെഞ്ചുറിയിൽ വെസ്റ്റ് ഇൻഡീസ് എട്ട് വിക്കറ്റിന് 264 റൺസിലേക്ക് കുതിച്ചപ്പോൾ ദക്ഷിണാഫ്രിക്കയുടെ പോരാട്ടം മത്സരം തീരാൻ മൂന്ന് പന്ത് ശേഷിക്കെ 245ൽ അവസാനിച്ചു.

ലോക കിരീടമില്ലാത ഹാൻസി ക്രോണിയും ഡാരിൽ കള്ളിനായും മാക് മില്ലനുമൊക്കെ പാഡഴിക്കുന്നത് നിരാശയോടെയാണ് പ്രോട്ടീസ് ആരാധകർ കണ്ടുനിന്നത്