മുംബൈ: ലോകക്കപ്പിന് ശേഷം വിരമിക്കുമെന്ന അഭ്യൂഹങ്ങള്‍ നിലനില്‍ക്കെ മുന്‍ ഇന്ത്യന്‍ നായകന്‍ എം.എസ്.ധോണി വരാനിരിക്കുന്ന വെസ്റ്റിന്‍ഡീസ് പര്യടനത്തില്‍ ഉണ്ടാകില്ല എന്ന് ഉറപ്പായി. ധോണി സ്വയം പര്യടനത്തില്‍ നിന്ന് പിന്മാറുന്നതായി ബിസിസിഐയെ അറിയിച്ചതായി ദേശീയമാധ്യമങ്ങള്‍ സൂചിപ്പിച്ചു. എന്നാല്‍ നിലവിലെ വിക്കറ്റ് കീപ്പര്‍ ബാറ്റ്‌സ്മാന്‍ ഋഷഭ് പന്തിന് അവസരം കിട്ടാനും കൂടുതല്‍ മത്സരപരിചയം വരാനും വിട്ടുനില്‍ക്കുന്നത് നല്ലതാണെന്ന നിലപാടാണ് ധോണി സ്വീകരിച്ചിരിക്കുന്നത്.
ടീമിന്റെ കൂടെ തുടരുന്ന ധോണി ഇത്തവണ യാത്രചെയ്യേണ്ടതില്ല എന്ന് സ്വയം തീരുമാനിച്ച് ബിസിസിഐയെ അറിയിക്കുകയായിരുന്നു. നിലവിലെ യുവനിരയുടെ കടന്നുവരവിന് ധോണി സ്വാഭാവികമായി വഴിയൊരുക്കുമെന്നും പരിശീലിപ്പിക്കാന്‍ സഹായമൊരുക്കുമെന്നുമാണ് ധാരണയില്‍ എത്തിയിരിക്കുന്നത്. ഇതിനിടെ ടീമിനൊപ്പം തുടരുന്ന വിക്കറ്റ് കീപ്പര്‍ ബാറ്റ്‌സ്മാന്‍ ദിനേശ്കാര്‍ത്തിക് റിസര്‍വ്വ് കളിക്കാരനായി ടീമിനൊപ്പം ഉണ്ടാകുമെന്നും ബിസിസിഐ മുന്നേ വ്യക്തമാക്കിയിരുന്നു.
