ജമ്മു-കാശ്മീര്: കാര്ഗ്ഗില് മലനിരകളില് 20 വര്ഷത്തിന് ശേഷവും വന് ആയുധശേഖരവും മറ്റ് സാധനസാമഗ്രികളും കണ്ടെത്തി. ഭാരതസൈന്യത്തിന്റെ പോരാട്ടവീര്യം ശരിക്കുമറിഞ്ഞ പാക് ഭീകരന്മാര് തോറ്റോടിയപ്പോള് ഉപേക്ഷിക്കപ്പെട്ടവയാണെന്ന് സൈന്യം അറിയിച്ചു. ടൈഗര്,തോലോലിംഗ് പര്വ്വതനിരകളിലെ നിരവധി താഴ്വാരങ്ങളില് ഇതുപോലെ നിരവധി തവണ ഗ്രനേഡുകളും,പീരങ്കികളുടെ യന്ത്രഭാഗങ്ങളും, യന്ത്രതോക്കുകളും കിട്ടിയതായി രക്ഷാവകുപ്പിന്റെ മുതിര്ന്ന അധികാരികള് സൂചിപ്പിച്ചു. പലയിടത്തും ഇനിയും സ്ഫോടന ശേഷിയുള്ള പലതും മണ്ണില് കിടക്കാന് സാധ്യതയുള്ളതിനാല് സഞ്ചാരികളെ പലയിടത്തേയ്ക്കും കടത്തിവിടാറില്ലെന്നും സൈനികര് പറഞ്ഞു.
ദ്രാസിലേയ്ക്കുള്ള യാത്രയില് ടൈഗര് മലനിരയിലെ ചിലഭാഗത്ത് വീരമൃത്യുവരിച്ച സൈനികര്ക്ക് ശ്രദ്ധാംഞ്ജലി അര്പ്പിക്കാനായി സഞ്ചാരികളെ അനുവദിക്കാറുണ്ട്. യുദ്ധസമയത്ത് ഏല്ലാ മേഖലകളും പരിശോധിക്കും എന്നാല് നിലവില് പലയിടങ്ങളും ഭയാനകമാംവിധം വിജനമാണെന്ന് അറിയിച്ച സൈന്യം ഗ്രാമീണരല്ലാത്ത ആരേയും കടത്തിവിടാറില്ലെന്നും പറഞ്ഞു.
ഇതിനിടെ പോയിന്റ് 4355 മേഖലയില് പാക് സൈനികര് ഉപേക്ഷിച്ച വിപുലമായ സൗകര്യങ്ങളൊരുക്കിയ 3 ബംഗറുകള് കണ്ടെത്തി. 25 പേര്ക്ക് വരെ കഴിയാവുന്ന സംവിധാനം ചെങ്കുത്തായ മലനിരയുടെ ഒരുവശത്ത് അവര് നിര്മ്മിച്ചിരുന്നുവെന്ന് സൈനികര് പറഞ്ഞു. ഭാരതസൈന്യത്തിന്റെ മേല് നേരെ മുകളില്നിന്ന് അനായാസം ആക്രമണം നടത്താന്പറ്റുന്ന വിധമാണ് പണിതിരുന്നത്. എന്നാല് നമ്മുടെ കനത്ത വ്യോമാക്രമണമാണ് അവരെ തകര്ത്തുകളഞ്ഞതെന്നും സൈനികര് ഓര്ക്കുന്നു. പല മലനിരകളിലും ഘട്ടംഘട്ടമായി മാത്രമേ തിരച്ചില് നടത്താനാകൂ എന്ന് പറഞ്ഞ സൈനികര് പലയിടത്തും നിലവിലെ അതിര്ത്തിയില് പാക് സൈനികരുടെ താവളങ്ങളുണ്ടെന്നും നമ്മുടെ സാന്നിധ്യം മനസ്സിലാക്കുമ്പോള് പതുക്കെ അതുപേക്ഷിച്ച് അടുത്ത പ്രദേശത്തേയ്ക്ക് അവര് രക്ഷപെടാറാണുള്ളതെന്നും സൈനികര് സൂചിപ്പിച്ചു.