ന്യൂഡല്ഹി: വീരസൈനികരുടെ ബലിദാനത്തെ സ്മരിക്കാനും കാര്ഗില് യുദ്ധവിജയമാഘോഷിക്കാനുമായി രാജ്യരക്ഷാമന്ത്രി രാജ്നാഥ് സിംഗ് ഇന്ന് ജമ്മുവിലെത്തി. യുദ്ധസ്മാരക സന്ദര്ശനവും ജവാന്മാര്ക്ക് ശ്രദ്ധാഞ്ജലിയും അര്പ്പിച്ചഅദ്ദേഹം തുടര്ന്ന് കാര്ഗില് മേഖലകളിലെ സൈനികത്താവളങ്ങള് സന്ദര്ശിക്കുമെന്നും സൈനികവൃത്തങ്ങള് അറിയിച്ചു. ഓപ്പറേഷന് വിജയിന്റെ 20-ാം വാര്ഷികത്തില് കേന്ദ്രമന്ത്രി സൈനികരെ അഭിസംബോധന ചെയത് സംസാരിക്കും. കഴിഞ്ഞ മാസം രാജ്നാഥ് സിംഗ് കാശ്മീരും ലഡാക്കും സന്ദര്ശിച്ചിരുന്നു.
ഡല്ഹിയില് വിവിധ സേനാവിഭാഗങ്ങളുടെ വ്യത്യസ്തപരിപാടികള് ആരംഭിച്ചതിന് ശേഷമാണ് രാജ്യരക്ഷാമന്ത്രിയുടെ ജമ്മു സന്ദര്ശനം. കരസേനാ മേധാവി വിപിന് റാവത്ത് അനുഗമിക്കുന്നുണ്ട്. ദ്രാസില് കാര്ഗില് വിജയ് ദിവസിന്റെ 3 ദിവസം നീളുന്ന പരിപാടികള് 24-ാം തിയതി ആരംഭിക്കും.കട്ടുവാ, ബസംതര് പ്രദേശത്ത് അതിര്ത്തി സുരക്ഷാസേന പണിതീര്ത്ത രണ്ടു പാലങ്ങള് അദ്ദേഹം ഉദ്ഘാടനം ചെയ്യുമെന്ന് സൈനികവൃത്തങ്ങള് അറിയിച്ചു.
കാര്ഗില് മേഖലയില് 1999ലാണ് പാക് ഭീകരന്മാരും സൈന്യവും നുഴഞ്ഞുകയറി ഭാരതത്തിനെതിരെ ആക്രമണം ആരംഭിച്ചത്. ജൂലൈമാസം 3 മുതല് 26 വരെ നീണ്ടുനിന്ന പോരാട്ടത്തില് 522 സൈനികര് വീരമൃത്യുവരിക്കുകയും 1363 പേര്ക്ക് പരിക്കേല്ക്കുകയും ചെയ്തു.18000 അടി ഉയരത്തിലേയ്ക്ക് കയറിച്ചെന്ന് ശത്രുക്കളെ തുരത്തിയ ഭാരതസൈന്യത്തിന്റെ മികവ് ലോകരാഷ്ട്രങ്ങള് അമ്പരപ്പോടെയാണ് നോക്കിക്കണ്ടത്.