Health

കരളിനെ സംരക്ഷിക്കാം; ഇന്ന് ലോക ഹെപ്പറ്റൈറ്റിസ് ദിനം

ഇന്ന് ലോക ഹെപ്പറ്റൈറ്റിസ് ദിനം. മനുഷ്യശരീരത്തിലെ ഏറ്റവും വലിയ ആന്തരിക അവയവമായ കരളിനെ ബാധിക്കുന്ന മാരകരോഗങ്ങള്‍ക്ക് കാരണക്കാരനായ വൈറസാണ് ഹെപ്പറ്റൈറ്റിസ്.

ഹെപ്പറ്റൈറ്റിസ് വൈറസ് നിസ്സാരക്കാരനല്ല. ലോകാരോഗ്യ സംഘടനയുടെ കണക്കനുസരിച്ച് ലോകത്തെ 325 ദശലക്ഷം ആളുകള്‍ ഹെപ്പറ്റൈറ്റിസ് ബി ബാധിതരും 170 ദശലക്ഷം ആളുകള്‍ ഹെപ്പറ്റൈറ്റിസ് സി ബാധിതരുമാണ്. ഇന്ത്യയുടെ കണക്കനുസരിച്ച് 40 ദശലക്ഷം ഹെപ്പറ്റൈറ്റിസ് ബി ബാധിതരും 10-12 ദശലക്ഷം സി ബാധിതരുമുണ്ട്.

ഒരു വര്‍ഷത്തില്‍ ഹെപ്പറ്റൈറ്റിസ് വൈറസ് ബാധിച്ചുമരിക്കുന്നവരുടെ എണ്ണം ഒരുലക്ഷത്തിലെറെയാണ്. സമൂഹത്തില്‍ 12ല്‍ ഒരാള്‍ക്കു വീതം ഹെപ്പറ്റൈറ്റിസ് രോഗബാധയുണ്ട്. എന്നാല്‍ 80 ശതമാനംപേരും രോഗം തിരിച്ചറിയുന്നില്ലെന്നതാണ് വസ്തുത.

ഹെപ്പറ്റൈറ്റിസ്-എ,ബി,സി,ഡി, ഇ എന്നിവയാണ് രോഗം പരത്തുന്ന വൈറസുകള്‍. ഹെപ്പറ്റൈറ്റിസ്-എ, ഇ എന്നിവ മലിനജലത്തില്‍ കൂടിയും ആഹാരത്തില്‍ കൂടിയും പകര്‍ന്ന് പനി, ഛര്‍ദ്ദി എന്നി രോഗലക്ഷണങ്ങളോടെ പ്രത്യക്ഷപ്പെടുന്നു. എന്നാല്‍ ഹെപ്പറ്റൈറ്റിസ് ബി , സിയും രോഗലക്ഷണങ്ങളൊന്നും കാണിക്കാതെ രക്തത്തില്‍ വളരെക്കാലം കാണപ്പെടുകയും കരള്‍ കോശങ്ങളെ സാവധാനം ബാധിച്ച് കാലക്രമേണ സിറോസിസ്, കരള്‍ അര്‍ബുദം എന്നി രോഗാവസ്ഥകളിലേക്ക് നയിക്കുന്നു. ഇത് രക്തത്തിലൂടെയും ശരീരസ്രവങ്ങളിലൂടെയും രോഗിയില്‍ നിന്നും മറ്റുളളവരിലേക്ക് പകരുന്നു.

രോഗിയുമായി അടുത്ത സമ്പര്‍ക്കം ഉള്ളവര്‍, മയക്കുമരുന്ന് കുത്തിവയ്ക്കുന്നവര്‍, ഒന്നിലധികം ലൈംഗിക പങ്കാളിയുള്ളവര്‍, ആരോഗ്യപ്രവര്‍ത്തകര്‍, രോഗബാധിതരായ അമ്മമാരുടെ കുഞ്ഞുങ്ങള്‍, ഡയാലിസിസ് രോഗികള്‍ എന്നിവര്‍ക്ക് രോഗസാധ്യത കൂടുതലാണ്.

സ്‌ക്രീനിങ് ടെസ്റ്റ് നടത്തി കൃത്യസമയത്ത് ചികിത്സ നടത്തിയാല്‍ ഭേദമാകുന്ന രോഗമാണ് ഹെപ്പറ്റൈറ്റിസ്.എന്നാല്‍ ചികിത്സ രീതികളെ കുറിച്ചു അറിവിലാത്തതാണ് രോഗം വര്‍ദ്ധിക്കാനുള്ള പ്രധാനകാരണം. നാഷണല്‍ ഇമ്മ്യൂണൈസേഷന്‍ വഴി കുഞ്ഞുങ്ങള്‍ക്കും വാക്‌സിന്‍ എടുക്കുന്നുണ്ട്.

ഹെപ്പറ്റൈറ്റിസ് ബി യ്ക്ക് ഫലപ്രദമായ വാക്‌സിനും ഹെപ്പറ്റൈറ്റിസ് സിയ്ക്ക് ഫലപ്രദമായ ഗുളികകളും ലഭ്യമാണ്. 2030 ഓടെ ഹെപ്പറ്റൈറ്റിസിനെ ലോകത്തുനിന്നും തുടച്ചു നീക്കുക എന്നതാണ് ലോകാരോഗ്യസംഘടനയുടെ ലക്ഷ്യം.

ഹെപ്പറ്റൈറ്റിസ് ബി വൈറസ് കണ്ടുപിടിച്ച ഓസ്‌ട്രേലിയന്‍ ശാസ്ത്രജ്ഞനായ സാമുവല്‍ ബ്ലംബര്‍ഗിന്റെ ജന്മദിനമാണ് ജൂലൈ 28ന് ഹെപ്പറ്റൈറ്റിസ് ദിനമായി ആചരിക്കുന്നത്.

4 Shares

Scroll down for comments

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close