ടോറണ്ടോ: ടെന്നീസ് വനിതാ ലോക റാങ്കിങ്ങില് നവോമി ഓസാക്ക ഒന്നാം നമ്പറിലേക്ക് തിരിച്ചെത്തി. റോജേഴ്സ് കപ്പില് കരോളിന പ്ലിസ്കോവ പരാജയപ്പെട്ടതോടെയാണ് ഓസാക്കയ്ക്കു ഒന്നാം റാങ്ക് തിരിച്ചു കിട്ടിയത്.
ഒന്നാം സ്ഥാനക്കാരിയായ ആഷ്ലി ബാര്ട്ടി രണ്ടാം റൗണ്ടില് പുറത്തായതോടെ പ്ലിസ്കോവയ്ക്ക് നറുക്ക് വീണിരുന്നു. ക്വാര്ട്ടറില് ജയിച്ചാല് റാങ്കിങ്ങില് ഒന്നാമതെത്താന് പ്ലിസ്കോവയ്ക്ക് സാധിക്കുമായിരുന്നു. നിര്ഭാഗ്യവശാല് ക്വാര്ട്ടറില് കാനഡയുടെ ബിന്ക അന്ഡ്രുവിനോട് ദയനീയമായി പരാജയപ്പെടുകയായിരുന്നു.
പ്ലിസ്കോവ വീണതോടെ ഓസാക്ക റാങ്കിങ്ങില് ഒന്നാമതെത്തുകയായിരുന്നു.ആദ്യ സെറ്റില് ഒരു ഗെയിം പോലും നേടാന് പ്ലിസ്കോവയ്ക്ക് സാധിച്ചിരുന്നില്ല. രണ്ടാം സെറ്റില് തിരിച്ചടിച്ചിരുന്നെങ്കിലും പരാജയമായിരുന്നു ഫലം. സ്കോര്: 6-0, 2-6, 6-4.
ക്വാര്ട്ടറില് ഓസാക്ക, അമേരിക്കയുടെ സെറീന വില്യംസിനെ ശനിയാഴ്ച നേരിടും. കഴിഞ്ഞ യുഎസ് ഓപ്പണ് ഫൈനലിലും സെറീന തന്നെയായിരുന്നു ഓസാക്കയുടെ എതിരാളി. യുഎസ് ഓപ്പണില് സെറീനയെ വീഴ്ത്തി തന്റെ കന്നി ഗ്രാന്ഡ്സ്ലാം ഓസാക്ക സ്വന്തമാക്കിയിരുന്നു.
