Football

പ്രീമിയര്‍ ലീഗ്: ഗോള്‍ നിറച്ച് ലിവര്‍പൂള്‍

ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ലിവര്‍പൂള്‍ ജയത്തോടെ തുടങ്ങി. നോര്‍വിച്ച് സിറ്റിയെ തോല്‍പ്പിച്ചത് ഒന്നിനെതിരെ നാലു ഗോളുകള്‍ക്ക്. ആദ്യപകുതിയില്‍ തന്നെ വലനിറയെ ഗോളടിച്ച ലിവര്‍പൂള്‍ കളിയിലുടനീളം ആധിപത്യം നിലനിര്‍ത്തി. നോര്‍വിച്ചിന്റെ ക്യാപ്റ്റന്‍ ഗ്രാന്റ് ഹാന്‍ലെയുടെ സെല്‍ഫ് ഗോളിലൂടെ തുടങ്ങിയ കളിയില്‍ ലിവര്‍പ്പൂള്‍ 3 ഗോളുകളും കൂടി അടിച്ചുകൂട്ടി. മറുപടിയായി നോര്‍വിച്ചിനുവേണ്ടി പുക്കുവാണ് ആശ്വാസ ഗോള്‍ നേടിയത്. ലിവര്‍പൂളിന് വേണ്ടി സല(19) വാന്‍ഡിക്(28) ഓറിഗി(42) എന്നിവര്‍ ഗോള്‍ നേടി. ഒരു കളി മാത്രം നടന്ന ആദ്യദിനത്തില്‍ ലിവര്‍പൂള്‍ ജയത്തോടെ 3 പോയിന്റ് നേടി.

മൂന്ന് വര്‍ഷങ്ങള്‍ക്ക് ശേഷം പ്രീമിയര്‍ ലീഗില്‍ എത്തുന്ന നോര്‍വിച്ചിന് ആദ്യമത്സരം തന്നെ പൊള്ളുന്ന അനുഭവമായി. ലിവര്‍പൂളിന്റെ ഡിവോക് ഒറിഗിയുടെ ഏഴാം മിനിറ്റിലെ മനോഹരമായ ഒരു അതിവേഗക്രോസ്സ് നായകന്‍ ഹാന്‍ലെ ഗതിമാറ്റിവിട്ടത് സ്വന്തം വലയിലേയ്ക്കായിരുന്നു(1-0).തുടര്‍ന്ന് 19-ാം മിനിറ്റില്‍ സ്റ്റാര്‍ സട്രൈക്കര്‍ മുഹമ്മദ് സലാ റോബര്‍ട്ടോ ഫെര്‍മിനോയുടെ പാസ്സ് കാലില്‍കുരുക്കി വലയിലെത്തിച്ച്    രണ്ടാം ഗോള്‍ നേടി(2-0).

ഇതിനിടെ ജര്‍മ്മന്‍ മിഡ്ഫീല്‍ഡര്‍ സ്റ്റിപ്പര്‍മാന്റെ മികച്ച ഷൂട്ട് ലിവര്‍പൂള്‍ ഗോളി അലിസ്സണ്‍ വിദഗ്ധമായി തട്ടിയകറ്റി ഒരു ഗോള്‍ രക്ഷപെടുത്തി. എന്നാല്‍ സലായുടെ മികച്ച കോര്‍ണര്‍ ശ്രദ്ധിക്കപ്പെടാതെ നിന്ന വിര്‍ജില്‍ വാന്‍ ഡിക് ഹെഡറിലൂടെ 28-ാം മിനിറ്റില്‍ മൂന്നാം ഗോളാക്കിമാറ്റി(3-0). ട്രെന്റ് അലക്‌സാണ്ടറുടെ കിടിലന്‍ പാസ്സ് ഒറിഗി കണ്ണടച്ചു തുറക്കുംമുന്നേ നെറ്റിലേയ്ക്ക് അടിച്ചുകയറ്റി ടീമിന്റെ നാലാം ഗോളും നേടി(4-0).

ചെങ്കുപ്പായക്കാരുടെ മികച്ച പ്രതിരോധനിരയെ മറികടക്കാനാകാതെ വിഷമിച്ച നോര്‍വിച്ച് പക്ഷെ സ്റ്റാര്‍ സ്‌ട്രൈക്കര്‍ തീമു പുക്കുവിലൂടെ ആഘാതം കുറച്ചു(1-4). ലിവര്‍പൂള്‍ ഗോളി അലിസ്സണ്‍ തെന്നിവീണ് പരിക്കേറ്റ ശേഷം വലകാത്തത് അഡ്രീയാനായിരുന്നു.

33 Shares

Scroll down for comments

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close