Kerala

‘ ആ മകൻ യാത്രയായത് മൂന്ന് കോടി ജനങ്ങളുടെ ഹൃദയത്തിലേയ്ക്ക് ‘ ലിനുവിന്റെ അമ്മയ്ക്ക് മോഹൻലാലിന്റെ കത്ത്

കൊച്ചി : കോഴിക്കോട് ചെറുവണ്ണൂരില്‍ പ്രളയത്തില്‍ രക്ഷാപ്രവര്‍ത്തനം നടത്തുന്നതിനിടെ മരണപ്പെട്ട സേവാഭാരതി പ്രവര്‍ത്തകന്‍ ലിനുവിന്റെ അമ്മയ്ക്ക് സാന്ത്വനമായി നടൻ മോഹൻലാലിന്റെ കത്ത് . മോഹന്‍ലാല്‍ ചെയര്‍മാനായിട്ടുള്ള വിശ്വശാന്തി ഫൗണ്ടേഷന്റെ ലെറ്റർപാഡിലാണ് കത്ത് .

കത്തിന്റെ പൂർണ്ണരൂപം ..

പ്രിയപ്പെട്ട അമ്മയ്ക്ക് ,

‘ അമ്മ ക്യാമ്പിലായിരുന്നു എന്ന് അറിയാം .ക്യാമ്പിലേക്ക് അമ്മയ്ക്ക് കൂട്ടായി വന്ന മകൻ ഇന്ന് അമ്മയുടെ കൂടെ ഇല്ലെന്നുമറിയാം. ആ മകൻ യാത്രയായത് മൂന്നരക്കോടി ജനങ്ങളുടെ ഹൃദയത്തിലേക്കാണ്. മറ്റൊരാൾക്ക് വേണ്ടി ജീവിക്കാൻ വലിയ വലിയ മനസ് വേണം. മറ്റുള്ളവർക്ക് വേണ്ടി ജീവൻ നൽകാൻ വലിയ മനസും ധീരതയും വേണം. ധീരനായിരുന്നു അമ്മയുടെ മകൻ. ഞാൻ ഉൾപ്പെടുന്ന ഈ സമൂഹത്തിനു വേണ്ടിയാണ് അമ്മയുടെ മകൻ അമ്മയെ വിട്ടു പോയത് . വാക്കുകൾ കൊണ്ട് ആശ്വസിപ്പിക്കാൻ കഴിയില്ലെന്നറിയാം . ഇതു പോലെ ഒരു മകനെ സമൂഹത്തിനു നൽകിയതിനു മറ്റൊരു മകൻ എഴുതുന്ന സ്നേഹ വാക്കുകൾ ആയി ഇതിനെ കരുതണം .

സ്നേഹത്തോടെ …
പ്രാർത്ഥനയോടെ …
അമ്മയുടെ
മോഹൻലാൽ

ലിനുവിന്റെ കുടുംബത്തിന് മോഹന്‍ലാല്‍ ചെയര്‍മാനായിട്ടുള്ള വിശ്വശാന്തി ഫൗണ്ടേഷന്‍ വീട് നിര്‍മിച്ച് നല്‍കുമെന്നും അറിയിച്ചിട്ടുണ്ട് . മാത്രമല്ല ലിനുവിന്റെ കടങ്ങൾ തീർക്കാനുള്ള തുകയും ഫൗണ്ടേഷൻ നൽകും . വിശ്വശാന്തിയുടെ പ്രതിനിധിയായി എത്തിയ മേജര്‍ രവി ലിനുവിന്റെ വീട് സന്ദര്‍ശിച്ച ശേഷമാണ് ഇക്കാര്യം അറിയിച്ചത്.

അടിയന്തര സഹായമായി ഒരു ലക്ഷം രൂപ ലിനുവിന്റെ അമ്മയ്ക്ക് നൽകി .ഇന്ന് ഉച്ചയ്ക്കാണ് മേജർ രവിയും സംഘവും ലിനുവിന്റെ വീട്ടിലെത്തിയത് . കഴിഞ്ഞ ദിവസം മോഹൻലാൽ ലിനുവിന് ആദരാഞ്ജലികൾ അർപ്പിച്ച് ഫെയ്സ്ബുക്ക് പോസ്റ്റിട്ടിരുന്നു.

2K Shares

Scroll down for comments

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close