Sports

അവസാന ഏകദിനത്തിലും എതിരാളികളെ തകര്‍ത്ത് ഗെയ്ല്‍; നിറകൈയ്യടിയോടെ താരത്തിന് ഗംഭീര യാത്രയയപ്പ്

ട്രിനിഡാഡ്: സംശയങ്ങള്‍ക്കും അഭ്യൂഹങ്ങള്‍ക്കും ഒടുവില്‍ ക്രിസ് ഗെയ്ല്‍ കളി അവസാനിപ്പിച്ചിരിക്കുകയാണ്. എന്നും മായാതെ നില്‍ക്കുന്ന വിടര്‍ന്ന ചിരിയോടെ തന്നെ അവസാന ഇന്നിങ്‌സും കളിച്ച് ഗെയ്ല്‍ മടങ്ങി. ഇന്ത്യയ്ക്കെതിരായ പരമ്പരയിലെ അവസാന ഏകദിനത്തില്‍ 41 പന്തില്‍ 72 റണ്‍സുമായാണ് ഗെയ്ല്‍ കളി അവസാനിപ്പിച്ചത്.

പതിവ് പോലെ എതിരാളികളെ യാതൊരു കൂസലുമില്ലാതെ തകര്‍ത്ത ഗെയ്ല്‍ 11 ഓവറില്‍തന്നെ വിന്‍ഡീസ് സ്‌കോര്‍ 120-ലെത്തിച്ചു. നേരത്തെ, ലോകകപ്പോടെ രാജ്യാന്തര ക്രിക്കറ്റില്‍ നിന്ന് വിരമിക്കുന്നുവെന്ന് അറിയിച്ചിരുന്ന ഗെയ്ല്‍ പിന്നീട് തീരുമാനം മാറ്റുകയായിരുന്നു. ഏകദിനത്തിലെ 301-ാം ഏകദിനം കളിക്കുന്ന ഗെയ്ല്‍, 301-ാം ജഴ്‌സി നമ്പറുമായാണ് കളത്തിലിറങ്ങിയത്.

അഞ്ച് സിക്‌സറിന്റെയും എട്ട് ഫോറിന്റെയും സഹായത്തോടെയാണ് ഗെയ്ല്‍ 72 റണ്‍സെടുത്തത്. ലൂയിസ് 29 പന്തില്‍ മൂന്ന് സിക്‌സറിന്റെയും അഞ്ച് ഫോറിന്റെയും സഹായത്തോടെ 43 റണ്‍സെടുത്തു. ലൂയിസ് 10.5-ാമത്തെ ഓവറില്‍ ആദ്യ വിക്കറ്റായി പുറത്താകുമ്പോള്‍ വിന്‍ഡീസ് സ്‌കോര്‍ 115-ലെത്തിയിരുന്നു. അടുത്ത ഓവറില്‍ ഗെയ്‌ലും പുറത്തായി.

12ാം ഓവറില്‍ ഖലീല്‍ അഹമ്മദിന്റെ പന്തില്‍ ഇന്ത്യന്‍ ക്യാപ്റ്റന്‍ വിരാട് കോലിയുടെ ഉജ്വല ക്യാച്ചിലാണ് ഗെയ്ല്‍ പുറത്തായത്. അപ്പോഴേയ്ക്കും ആരാധകര്‍ക്ക് എക്കാലവും ഓര്‍മിക്കാനുള്ള വക ഗെയ്ല്‍ സമ്മാനിച്ചിരുന്നു.

ഗെയ്ലിന് ചുറ്റുമെത്തിയ ഇന്ത്യന്‍ താരങ്ങള്‍ നിറകൈയ്യടികളോടെയാണ് യാത്രയയപ്പ് നല്‍കിയത്. ചിലര്‍ പുറത്തുതട്ടിയും മറ്റുചിലര്‍ ആശ്ലേഷിച്ചുമാണ് അവിസ്മരണീയ ഇന്നിങ്‌സിനൊടുവില്‍ ഗെയ്‌ലിനെ യാത്രയാക്കിയത്.

സെഞ്ചുറിയാഘോഷങ്ങളെ അനുകരിച്ച് ബാറ്റിനു മുകളില്‍ ഹെല്‍മറ്റ് കോര്‍ത്ത് ഗാലറിയെ ഒന്നടങ്കം അഭിവാദ്യം ചെയ്താണ് ഗെയ്ല്‍ പവലിയനിലേക്കു മടങ്ങിയതും. ആരാധകര്‍ ഒന്നാകെ എഴുന്നേറ്റുനിന്ന് താരത്തിന് ആദരമര്‍പ്പിച്ചു.

390 Shares

Scroll down for comments

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close