ന്യൂഡല്ഹി: പദ്മ പുരസ്കാരത്തിനായി കേന്ദ്ര കായിക മന്ത്രാലയം സമര്പ്പിച്ച ഒമ്പത് പേരടങ്ങുന്ന പട്ടികയില് ഒമ്പതും വനിതകള്. ബോക്സിംഗ് താരം എം സി മേരി കോം, ബാഡ്മിന്റണ് താരം പി വി സിന്ധു, ടേബിള് ടെന്നീസ് താരം മണിക ബത്ര, ഇന്ത്യന് വനിതാ ക്രിക്കറ്റ് ടീം ക്യാപ്റ്റന് ഹര്മന്പ്രീത് കൗര്, ഹോക്കി ക്യാപ്റ്റന് റാണി രാംപാല്, മുന് ഷൂട്ടര് സുമ ഷിരുര്, പര്വതാരോഹകരായ താഷി, നുങ്ഷി മാലിക് എന്നിവരാണ് പട്ടികയില് ഉള്പ്പെട്ടിട്ടുള്ളത്.
ആറു തവണ ലോക ചാമ്പ്യനായ ബോക്സിംഗ് താരം മേരി കോമിനെ പദ്മവിഭൂഷണ് പുരസ്കാരത്തിനാണ് ശുപാര്ശ ചെയ്തിട്ടുള്ളത്.. ഇന്ത്യന് കായിക ചരിത്രത്തില് ആദ്യമായാണ് ഒരു വനിതയുടെ പേര് പദ്മവിഭൂഷണ് പുരസ്കാരത്തിന് നിര്ദേശിക്കുന്നത്. ഭാരതരത്ന പുരസ്കാര ജേതാവായ മേരികോമിന് 2013ല് പദ്മഭൂഷണും, 2006ല് പദ്മശ്രീയും ലഭിച്ചിട്ടുണ്ട്.
രാജ്യത്തെ മൂന്നാമത്തെ പരമോന്നത സിവിലിയന് പുരസ്കാരമായ പദ്ഭൂഷണ് പുരസ്കാരത്തിനാണ് ഇത്തവണ പി വി സിന്ധുവിന്റെ പേര് കായിക മന്ത്രാലയം നിര്ദേശിച്ചിട്ടുള്ളത്. 2015ല് പദ്മശ്രീ ലഭിച്ച സിന്ധുവിനെ 2017ല് പദ്മഭൂഷണു നാമനിര്ദേശം ചെയ്തിരുന്നുവെങ്കിലും അന്തിമ പട്ടികയില് ഉള്പ്പെട്ടിരുന്നില്ല.
കായിക രംഗത്തു നിന്നും മൂന്ന് താരങ്ങള്ക്കാണ് മുമ്പ് പദ്മവിഭൂഷണ് ലഭിച്ചിട്ടുള്ളത്. ലോക ചെസ് ചാമ്പ്യനായിരുന്ന വിശ്വനാഥ് ആനന്ദ്, ക്രിക്കറ്റ് ഇതിഹാസം സച്ചിന് ടെണ്ടുല്ക്കര് എന്നിവര് കൂടാതെ പര്വതാരോഹകന് സര് എഡ്മണ്ട് ഹിലരിക്ക് മരണാനന്തര ബഹുമതിയായും പുരസ്കാരം ലഭിച്ചിരുന്നു.കായിക മന്ത്രാലയത്തിന്റെ അന്തിമ പട്ടിക പുരസ്കാര കമ്മിറ്റിക്ക് അയച്ചിട്ടുണ്ട്. 2020 ജനുവരി 25നാണ് പുരസ്കാര ജേതാക്കളുടെ പേരുകള് പ്രഖ്യാപിക്കുക.