ഏത് അവസരത്തിലും ഇന്ത്യന് നായകന് വിരാട് കോലിക്ക് പിന്തുണ നല്കുന്ന വ്യക്തിയാണ് ഭാര്യ അനുഷ്ക ശര്മ്മ. തന്റെ ഭാര്യയാണ് തനിക്കേറ്റവും വലിയ കരുത്തെന്ന് കോലിയും പല തവണ പറഞ്ഞിട്ടുണ്ട്. കോലിയുടെ വാക്കുകള് അക്ഷരാര്ഥത്തില് സത്യമാണെന്ന് വ്യക്തമാക്കുകയാണ് കഴിഞ്ഞ ദിവസത്തെ സംഭവം.
ഡല്ഹിയിലെ ഫിറോസ് ഷാ കോട്ലാ സ്റ്റേഡിയത്തിന്റെ പേര് അരുണ് ജയ്റ്റ്ലി സ്റ്റേഡിയം എന്നാക്കി മാറ്റുന്ന ചടങ്ങില് പങ്കെടുക്കാനെത്തിയതാണ് വിരാടും ഭാര്യ അനുഷ്കയും. സ്റ്റേഡിയത്തിന്റെ ഒരു പവലിയന് വിരാട് കോലിയുടെ പേര് നല്കുന്ന ചടങ്ങും നടന്നിരുന്നു. ചടങ്ങിനിടയില് കോഹ്ലി വികാരാധീനനാകുന്നതും ഭാര്യ അനുഷ്ക പെട്ടെന്ന് തന്നെ കോഹ്ലിയുടെ കൈ ചേര്ത്ത് പിടിക്കുകയും ചെയ്തു. താന് എപ്പോഴും കൂടെയുണ്ടാകുമെന്ന് പൂര്ണ പിന്തുണ നല്കുന്ന അനുഷ്കയുടെ വീഡിയോയാണ് സോഷ്യല് മീഡിയയില് വൈറലാവുന്നത്.
ക്രിക്കറ്റിലെ വിരാട് കോഹ്ലിയുടെ സംഭാവനകള്ക്കുളള അംഗീകാരമെന്ന നിലയിലാണ് ഡല്ഹി ഫിറോസ് ഷാ കോട്ല സ്റ്റേഡിയത്തിലെ സ്റ്റാന്ഡുകളിലൊന്നിന് വിരാടിന്റെ പേര് നല്കാന് ഡിഡിസിഎ തീരുമാനിച്ചത്. നിലവില് ഫിറോസ് ഷാ കോട്ലയില് സ്വന്തം പേരില് സ്റ്റാന്ഡുകളുള്ളത് ബിഷന് സിങ് ബേദിയ്ക്കും മൊഹീന്ദര് അമര്നാഥിനുമാണ്. പക്ഷെ രണ്ട് പേര്ക്കും വിരമിക്കലിന് ശേഷമാണ് ഈ അംഗീകാരം തേടിയെത്തിയത്.
നിലവില് നായകനായിരിക്കുമ്പോള് തന്നെയാണ് അംഗീകാരം കോലിയെ തേടി എത്തിയിരിക്കുന്നത്. പവലിയന്റെ അനാച്ഛാദനത്തിനു ശേഷം കോലി ഡിഡിസിഎയ്ക്കും ടീം അംഗങ്ങള്ക്കും, ബാല്യകാലത്തിലെ തന്റെ പരിശീലകനും നന്ദി അറിയിച്ചു. മുന് കായിക മന്ത്രി രാജ് വര്ധന് റാത്തോഡ്, കപില് ദേവ്, ഇന്ത്യന് ക്രിക്കറ്റ് ടീം അംഗങ്ങള് തുടങ്ങിയവരും ചടങ്ങില് സന്നിഹിതരായിരുന്നു.