സൂററ്റ്: മഴഭീഷണിയില്‍ നടന്ന നാലാം ടി20യില്‍ തകര്‍പ്പന്‍ ജയത്തോടെ ഭാരത വനിതകള്‍ ദക്ഷിണാഫ്രിക്കക്കെതിരെ പരമ്പര നേടി. മഴമൂലം 17 ഓവറായി ചുരുക്കിയ മത്സരത്തില്‍ 52 റണ്‍സിനാണ് പ്രോട്ടിയാസിനെ തോല്പിച്ചത്.അഞ്ചു മത്സരങ്ങള്‍ മഴമൂലം ഉപേക്ഷിച്ചതിനാല്‍ നിലവില്‍ ഇന്ത്യ 2-0ന് മുന്നിലാണ്. ആകെ ബാക്കിയുള്ളത് അഞ്ചാമത്തേതും അവസാനത്തേതുമായ മത്സരം മാത്രമാണ്.
നനഞ്ഞ ഔട്ട്ഫീല്‍ഡില്‍ ഇന്ത്യയെ ബാറ്റിംഗിനിറക്കിയ ദക്ഷിണാഫ്രിക്കയ്‌ക്ക് കണക്കുകൂട്ടലുകള്‍ പിഴച്ചു.17 ഓവറുകളിലായി ടീം ഇന്ത്യ 4 വിക്കറ്റിന് 140 എന്ന മികച്ച ടോട്ടല്‍ അടിച്ചെടുത്തു.തുടര്‍ന്ന് ബാറ്റ് ചെയ്ത അതിഥികള്‍ നിശ്ചിത 17 ഓവറില്‍ 7ന് 89ല്‍ ചുരുങ്ങി.ഓപ്പണര്‍ ഷഫാലി വര്‍മ്മയുടെ 33 പന്തില്‍ 46ഉം ജെമീമ റോഡ്രിഗ്‌സിന്റെ 33 റണ്‍സുമാണ് മികച്ച സ്‌കോര്‍ എത്താന്‍ സഹായിച്ചത്. തകര്‍പ്പന്‍ അടികള്‍ക്ക് പേര് കേട്ട സ്മൃതി മന്ഥാന(13) ഹര്‍മന്‍ പ്രീത് കൗര്‍(16),ദീപ്തി(20) എന്നിവരും സ്‌ക്കോര്‍ ഉയര്‍ത്തി.ദക്ഷിണാഫ്രിക്കയ്്ക് വേണ്ടി നദീനേ ക്ലാര്‍ക്കാണ് 2 വിക്കറ്റുകള്‍ വീഴ്‌ത്തിയത്.
മറുപടി ബാറ്റിംഗിനിറങ്ങിയ സന്ദര്‍ശകര്‍ക്ക് തുടക്കത്തിലേ പ്രഹരമേറ്റു. രണ്ടാമത്തെ ഓവറിലെ അഞ്ചാം പന്തില്‍ 9 റണ്‌സെടുത്ത ഓപ്പണര്‍ ലീ പുറത്തായി. തുടര്‍ന്ന് രണ്ടാം വിക്കറ്റ് കൂട്ടുകെട്ട് താളം കണ്ടെത്തിയെങ്കിലും സ്‌കോര്‍ 49ലെത്തിയപ്പോള്‍ രണ്ടാമനും സ്‌കോര്‍ 65ലെത്തിയപ്പോള്‍ 3-ാം വിക്കറ്റും വീണു. ബ്രിറ്റ്‌സ്(20) വോള്‍വാര്‍ട്ട്(23) എന്നിവര്‍ക്ക് മാത്രമേ രണ്ടക്കം കടക്കാനായുള്ളു.ഇന്ത്യയ്ക്ക് വേണ്ടി പൂനംയാദവ് 13 റണ്‍സ് മാത്രം വിട്ടുകൊടുത്ത് 3 വിക്കറ്റ് വീഴ്‌ത്തി.രാധായാദവ് 16ന് 2 വിക്കറ്റുകളും നേടി.ദീപ്തി ശര്‍മയ്‌ക്ക് ഒരു വിക്കറ്റ് ലഭിച്ചു. അവസാന ടി20 4-ാം തീയതി സൂറത്തില്‍ തന്നെ നടക്കും.
