വിശാഖപട്ടണം: ദക്ഷിണാഫ്രിക്കക്കെതിരായ ആദ്യ ടെസ്റ്റില് നിരവധി റെക്കോര്ഡുകളാണ് പിറന്നത്. ഓപ്പണിംഗ് വിക്കറ്റില് രോഹിത് ശര്മ്മ-മയങ്ക് അഗര്വാള് സഖ്യം മികച്ച ഫോമില് ബാറ്റ് ചെയ്തതോടെ ഒന്നാം വിക്കറ്റില് ഇന്ത്യ സ്കോര് ബോര്ഡില് എഴുതിച്ചേര്ത്തത് 317 റണ്സാണ്.
രോഹിതും അഗര്വാളും ടെസ്റ്റ് ക്രിക്കറ്റിന്റെ ചരിത്രത്തില് ദക്ഷിണാഫ്രിക്കക്കെതിരെ സെഞ്ച്വറി നേടുന്ന ആദ്യ ഓപ്പണിംഗ് സഖ്യമായി മാറി. ദക്ഷിണാഫ്രിക്കക്കെതിരായ പരമ്പരകളിലെ ഉയര്ന്ന ഓപ്പണിംഗ് കൂട്ടുകെട്ടായ 236 റണ്സെന്ന റെക്കോര്ഡും ഇവര്ക്ക് മുന്നില് പഴങ്കഥയായി. 1996ല് ഗാരി കേസ്റ്റണും ആന്ഡ്രൂ ഹഡ്സണും കുറിച്ച റെക്കോര്ഡാണ് തിരുത്തിക്കുറിക്കപ്പെട്ടത്.
ദക്ഷിണാഫ്രിക്കക്കെതിരെ ആദ്യമായി 300 റണ്സ് കൂട്ടുകെട്ടുണ്ടാക്കുന്ന ഇന്ത്യന് ഓപ്പണിംഗ് സഖ്യമെന്ന റെക്കോര്ഡും രോഹിത്-അഗര്വാള് ജോഡി സ്വന്തമാക്കി. ടെസ്റ്റില് 300 റണ്സ് കൂട്ടുകെട്ടുണ്ടാക്കുന്ന മൂന്നാമത്തെ മാത്രം സഖ്യമാണ് രോഹിത്തും അഗര്വാളും.
മധ്യ നിരയില് നിന്ന് സ്ഥാനക്കയറ്റം ലഭിച്ച് ഓപ്പണറായി അരങ്ങേറ്റം കുറിച്ച രോഹിത് ശര്മ്മ മികച്ച പ്രകടനമാണ് പുറത്തെടുത്തത്. 244 പന്തുകള് നേരിട്ട രോഹിത് 23 ബൗണ്ടറികളും 6 സിക്സറുകളും സഹിതം 176 റണ്സാണ് നേടിയത്. മറുവശത്ത് തന്റെ കരിയറിലെ കന്നി സെഞ്ച്വറിയാണ് മായങ്ക് അഗര്വാള് സ്വന്തമാക്കിയത്.
