ന്യൂഡല്‍ഹി: പാകിസ്ഥാന്‍ ബൗളര്‍മാര്‍ ഒരിക്കലും തന്നോട് ഉപദേശം തേടിയിട്ടില്ലെന്ന് മുന്‍ പാക് ഫാസ്റ്റ് ബൗളര്‍ ഷുഹൈബ് അക്തര്‍. അതില്‍ തനിക്ക് അതിയായ വിഷമം ഉണ്ടെന്നും ഷുഹൈബ് അക്തര്‍ അറിയിച്ചു. അതേസമയം ഇന്ത്യന്‍ താരങ്ങള്‍ ബൗളിങ്ങിലെ സംശയങ്ങളെ കുറിച്ചും മറ്റും തന്നോട് ഉപദേശം തേടാറുണ്ടെന്നും അദ്ദേഹം പറഞ്ഞു.
കഴിഞ്ഞ ദിവസം നടന്ന ടെസ്റ്റ് ക്രിക്കറ്റിലെ മുഹമ്മദ് ഷമിയുടെ മിന്നും വിജയത്തെ അഭിനന്ദിച്ചുകൊണ്ട് യൂടൂബില്‍ സംസാരിക്കുന്നതിനിടെയാണ് അദ്ദേഹം ഇക്കാര്യം പറഞ്ഞത്. ദക്ഷിണാഫ്രിക്കക്കെതിരായ മത്സരത്തില്‍ ആദ്യ ഇന്നിങ്സില് ഷമിക്ക് തിളങ്ങാനായില്ലെങ്കിലും രണ്ടാം ഇന്നിങ്സില് കത്തി കയറുകയായിരുന്നു ഷമി. ദക്ഷിണാഫ്രിക്കയുടെ അഞ്ച് വിക്കറ്റുകളാണ് ഷമി രണ്ടാം ഇന്നിങ്സില് പിഴുതത്. ഒരു വര്‍ഷത്തിനിടെ രണ്ടാം ഇന്നിങ്സില് മൂന്നാം തവണയാണ് ഷമി അഞ്ചാം വിക്കറ്റ് നേട്ടം കൈവരിക്കുന്നത്. 1996-ന് ശേഷം തട്ടകത്തില്‍ നടക്കുന്ന ടെസ്റ്റില്‍ രണ്ടാം ഇന്നിങ്സില് അഞ്ച് വിക്കറ്റ് നേടുന്ന ആദ്യ ഫാസ്റ്റ്ബൗളര്‍ കൂടിയാണ് ഷമി.
ഷമിയുടെ മികവിലാണ് ഇന്ത്യ ദക്ഷിണാഫ്രിക്കയെ 191 റണ്‍സിന് തകര്‍ത്തതും 203 റണ്‍സിന്റെ കൂറ്റന്‍ ജയം നേടിയതും. 10.5 ഓവറില്‍ രണ്ട് മെയ്ഡന്‍ ഓവര്‍ വീതം 35 റണ്‍സ് വഴങ്ങിയാണ് ഷമിയുടെ ഈ അഞ്ച് വിക്കറ്റ് നേട്ടം.
ലോകകപ്പിലെ പരാജയത്തില്‍ നിരാശനായ ഷമി തന്നെ വിളിച്ചിരുന്നുവെന്ന് ശുഹൈബ് അക്തര്‍ അറിയിച്ചു. തനിക്ക് ഒരു പാട് വിഷമം ഉണ്ടെന്നും ഇന്ത്യയ്‌ക്ക് വേണ്ടി ഒന്നും ചെയ്യാനാവില്ലെന്നും ഷമി പറഞ്ഞതായും ഷുഹൈബ് പറഞ്ഞു. മനസിന്റെ ധൈര്യം വീണ്ടെടുക്കാനും ഫിറ്റ്‌നസ് നിലനിര്‍ത്താനും താന്‍ ഉപദേശിച്ചിരുന്നുവെന്നും അദ്ദേഹം വ്യക്തമാക്കി.
വേഗതയ്‌ക്കൊപ്പം പന്ത് സ്വിങ് ചെയ്യിക്കാനുള്ള ഷമിയുടെ കഴിവ് വളരെ അധികം ചര്‍ച്ച ചെയ്യപ്പെട്ടതാണ്. ഉപഭൂഖണ്ഡത്തില്‍ തന്നെ വളരെ കുറച്ച് പേര്‍ക്കാണ് പന്ത് സ്വിങ് ചെയ്യാനുള്ള കഴിവുള്ളത്. മനസിരുത്തി കളിച്ചാല്‍ അതില്‍ ഷമി രാജാവാകുമെന്നും ശുഹൈബ് അക്തര്‍ പറഞ്ഞു. അതേസമയം പാകിസ്ഥാനിലെ ഒരു താരവും ബൗളിംങ് എങ്ങനെ മെച്ചപ്പെടുത്താമെന്ന് ഇതുവരെ അന്വേഷിച്ചിട്ടില്ലെന്നും ഷുഹൈബ് അക്തര്‍ പറഞ്ഞു. പാകിസ്ഥാന്‍ ക്രിക്കറ്റ് ടീമിനെ സംബന്ധിച്ച് തന്നെ ഇത് വളരെ അധികം വിഷമിപ്പിക്കുന്നുവെന്നും അദ്ദേഹം സൂചിപ്പിച്ചു.
