പൂനെ: ഓപ്പണര് മായങ്ക് അഗര്വാളിന് പിന്നാലെ നായകന് വിരാട് കോഹ്ലിയും സെഞ്ച്വറി നേടിയതോടെ രണ്ടാം ടെസ്റ്റില് ദക്ഷിണാഫ്രിക്കക്കെതിരെ ഇന്ത്യ കൂറ്റന് സ്കോറിലേക്ക്. രണ്ടാം ദിനം കളി പുരോഗമിക്കുമ്പോള് ഇന്ത്യ 3 വിക്കറ്റ് നഷ്ടത്തില് 356 റണ്സ് നേടിയിട്ടുണ്ട്.
3ന് 273 റണ്സെന്ന നിലയില് രണ്ടാം ദിനം കളി പുനരാരംഭിച്ച ഇന്ത്യക്കു വേണ്ടി വിരാട് കോഹ്ലി തന്റെ കരിയറിലെ 26ാം ടെസ്റ്റ് സെഞ്ച്വറിയാണ് കുറിച്ചത്. 16 ബൗണ്ടറികളടങ്ങിയ മനോഹരമായ ബാറ്റിംഗ് പ്രകടനമായിരുന്നു കോഹ്ലിയുടേത്. അതേസമയം, നായകന് ഉറച്ച പിന്തുണ നല്കിയ അജിങ്ക്യ രഹാനെ അര്ദ്ധ സെഞ്ച്വറിയുമായി ക്രീസിലുണ്ട്.
ആദ്യ ദിനം ടോസ് നേടിയ ഇന്ത്യ ബാറ്റിംഗ് തെരഞ്ഞെടുക്കുകയായിരുന്നു. ആദ്യ ടെസ്റ്റിന്റെ രണ്ട് ഇന്നിംഗ്സിലും സെഞ്ച്വറി കുറിച്ച ഓപ്പണര് രോഹിത് ശര്മ്മ(14)യുടെ വിക്കറ്റാണ് ഇന്നലെ ഇന്ത്യക്ക് ആദ്യം നഷ്ടമായത്. തുടര്ന്ന് ക്രീസില് ഒരുമിച്ച അഗര്വാള്പൂജാര സഖ്യം ഇന്ത്യന് ഇന്നിംഗ്സ് കെട്ടിപ്പടുത്തു. ഇരുവരും ചേര്ന്ന് 138 റണ്സാണ് കൂട്ടിച്ചേര്ത്തത്. ഇതിനിടയില് പൂജാര അര്ദ്ധ സെഞ്ച്വറി പിന്നിട്ടിരുന്നു. 112 പന്തുകള് നേരിട്ട പൂജാര 58 റണ്സ് നേടിയ ശേഷമാണ് മടങ്ങിയത്. കാഗിസോ റബാഡയാണ് ഇന്ത്യക്ക് നഷ്ടമായ 3 വിക്കറ്റുകളും സ്വന്തമാക്കിയത്.