പൂനെ: ദക്ഷിണാഫ്രിക്കക്കെതിരെ നായകന് വിരാട് കോഹ്ലി മുന്നില് നിന്ന് പടനയിച്ചപ്പോള് ഒന്നാം ഇന്നിംഗ്സില് ഇന്ത്യക്ക് കൂറ്റന് സ്കോര്. മികച്ച ഫോമില് ബാറ്റ് ചെയ്ത കോഹ്ലി ടെസ്റ്റ് കരിയറിലെ തന്റെ 7ാം ഇരട്ട സെഞ്ച്വറിയാണ് സ്വന്തമാക്കിയത്. ബാറ്റ്സ്മാന്മാര് എല്ലാവരും മികച്ച പ്രകടനം പുറത്തെടുത്തപ്പോള് ഒന്നാം ഇന്നിംഗ്സില് ഇന്ത്യ 5 വിക്കറ്റ് നഷ്ടത്തില് 601 റണ്സില് ഡിക്ലയര് ചെയ്തു.
ആദ്യ ദിനം ഓപ്പണര് മായങ്ക് അഗര്വാളിന്റെ പ്രകടനമാണ് ഇന്ത്യക്ക് മികച്ച തുടക്കം സമ്മാനിച്ചതെങ്കില് പിന്നീട് കോഹ് ലിയുടെ അസാമാന്യ പ്രകടനത്തിനാണ് പൂനെ വേദിയായത്. 336 പന്തുകള് നേരിട്ട കോഹ് ലി 33 ബൗണ്ടറികളും 2 സിക്സറുകളും സഹിതം പുറത്താകാതെ നേടിയത് 254 റണ്സ്. ഇതിനിടെ ടെസ്റ്റില് 7,000 റണ്സെന്ന നാഴികക്കല്ലും കോഹ്ലി പിന്നിട്ടു. രണ്ടാം ദിനം 3ന് 273 എന്ന നിലയില് കളി പുനരാരംഭിച്ച ഇന്ത്യക്കു വേണ്ടി അജിങ്ക്യ രഹാനെ 59 റണ്സ് നേടിയരുന്നു.
രഹാനെക്കു പിന്നാലെ കോഹ്ലിക്കൊപ്പം ക്രീസിലെത്തിയ രവീന്ദ്ര ജഡേജയും മികച്ച പ്രകടനം പുറത്തെടുത്തതോടെ ഇന്ത്യന് സ്കോര് അതിവേഗം മുന്നോട്ടുപോയി. 104 പന്തുകള് നേരിട്ട ജഡേജ 91 റണ്സുമായി പുറത്തായപ്പോള് ഇന്ത്യ ഇന്നിംഗ്സ് ഡിക്ലയര് ചെയ്യുകയായിരുന്നു.
