ഓസ്ലോ: യൂറോപ്യന്‍ ചാമ്പ്യന്‍ഷിപ്പില്‍ സ്പെയിനിനെ ഞെട്ടിച്ച് നോര്‍വ്വേ. യൂറോ2020നുള്ള ക്വാളിഫയര്‍ മത്സരത്തില്‍ സ്‌പെയിനെ 1-1നാണ് നോര്‍വ്വെ സമനിലയില്‍ തളച്ചത്. ഇതോടെ യോഗ്യത നേളനുള്ള സ്പെയിനിന്റെ കാത്തിരിപ്പ് നീളും. ഇന്നലെ ഓസ്ലോവില്‍ നടന്ന മത്സരത്തിലാണ് സ്പെയിനിന്റെ പ്രതീക്ഷകള്‍ നോര്‍വേ നീട്ടിവെപ്പിച്ചത്.
ആദ്യ പകുതിയില്‍ സോള്‍ നേടിയ ഗോളാണ് സ്പെയിനിനെ കാത്തത്. എന്നാല്‍ നോര്‍വേക്ക് വേണ്ടി കളിയുടെ അധികസമയത്ത് ജോഷ് കിംഗിന്റെ ബൂട്ടില്‍ നിന്ന് പിറന്ന പെനാല്‍റ്റി ഗോളാണ് സ്പെയിനിന്റെ വിജയ പ്രതീക്ഷ തകര്‍ത്തത്. ഇതോടെ മത്സരം 1-1ന് സമനിലയില്‍ പിരിഞ്ഞു. ഗ്രൂപ്പ് എഫില്‍ സെപയിന്‍ നിലവില്‍ രണ്ടാമതാണ്. ചൊവ്വാഴ്ച സ്വീഡനെതിരെ സമനിലയെങ്കിലും പിടിച്ചാലേ സ്പെയിനിന് യൂറോ കപ്പിന് യോഗ്യതനേടാനാകൂ.
യൂറോപ്പ്യന്‍ കളിക്കളത്തിലെ ഏറ്റവുമധികം കളത്തിലിറങ്ങിയ താരമെന്ന നേട്ടം സെര്‍ജിയോ റാമോസ് സ്വന്തമാക്കിയിരുന്നു. ഗോള്‍ കീപ്പര്‍ ഐകര്‍ കാസിയാസിന്റെ 167 മത്സരങ്ങളെന്ന നേട്ടമാണ് റാമോസ് മറികടന്നത്. എന്നാല്‍ വ്യക്തിഗതനേട്ടങ്ങള്‍ക്ക് എന്നും രണ്ടാം സ്ഥാനമേയുള്ളുവെന്ന് മത്സര ശേഷം റാമോസ് പറഞ്ഞു. മത്സരം വിജയിച്ചിരുന്നെങ്കില്‍ ഏറെ സന്തോഷമാകുമായിരുന്നു. പക്ഷെ കളിക്കളത്തില്‍ 168 മത്സരങ്ങളെന്നത് ടീം തനിക്ക് നല്‍കിയ ആദരമാണെന്നും റാമോസ് കൂട്ടിച്ചേര്‍ത്തു.
33 കാരനായ റയല്‍മാഡ്രിഡ് താരം റാമോസ് 2005ലാണ് സ്പെയിനിന് വേണ്ടി ആദ്യമായി കളത്തിലിറങ്ങിയത്. എന്നാല്‍ മൊത്തം യൂറോപ്പിലെ മത്സരങ്ങളുടെ കണക്കില്‍ 176 മത്സരങ്ങള്‍ കളിച്ചിട്ടുള്ള ബഫണാണ് മുന്‍പില്‍. മറ്റ് മത്സരങ്ങളില്‍ ഇറ്റലി, സ്വീഡന്‍, റൊമേനിയ, ഡെന്‍മാര്‍ക്ക് എന്നീ ടീമുകള്‍ വിജയിച്ചു.
