സൈപ്രസ്: യൂറോകപ്പ് യോഗ്യതാമത്സരങ്ങളില് റഷ്യയും ജര്മ്മനിയും തകര്പ്പന് ജയത്തോടെ മുന്നേറി. സൈപ്രസില് നടന്ന മത്സരത്തില് ആതിഥേയരെ റഷ്യ എതിരില്ലാത്ത അഞ്ചുഗോളുകള്ക്ക് കെട്ടുകെട്ടിച്ചപ്പോള് ജര്മ്മനി എസ്റ്റോണിയയെ എതിരില്ലാത്ത മൂന്ന് ഗോളിനും തുരത്തി.മറ്റ് മത്സരങ്ങളില് ഹംഗറി ഒരു ഗോളിന് അസര്ബൈജാനേയും ഒസ്ട്രിയ ഒറ്റ ഗോളിന് സ്ലോവേനിയയേയും പോളണ്ട് വടക്കന് മസഡോണയെ എതിരില്ലാത്ത രണ്ടുഗോളുകള്ക്കും വീഴ്ത്തി.കൊയേഷ്യ വെയില്സിനോട് ഒന്നേ ഒന്നിന്റെ സമനിലയും വഴങ്ങി.
സൈപ്രസിനെതിരെ റഷ്യയുടെ അതിശക്തമായ ആക്രമണമാണ് നടന്നത്.തികച്ചും ഏകപക്ഷീയമായ മത്സരത്തില് റഷ്യതുടക്കത്തിലേതന്നെ ഗോളടിച്ചു.ഡെന്നീസ് ചെറിഷേവാണ് 9-ാം മിനിറ്റിലെ ആദ്യഗോളിനുടമ.ആദ്യപകുതിയില് 22-ാം മിനിറ്റില് മാഗോമെഡ് ഒസോഡേവ് ലീഡ് 2-0 ആക്കി ഉയര്ത്തി.രണ്ടാം പകുതിയിലും ഒരു പ്രത്യാക്രമണവും നടത്താതിരുന്ന സൈപ്രസിന്രെ വല 3 തവണകൂടി റഷ്യന് പട കുലുക്കി.ആര്തെം സൂബ,അലക്സാണ്ടര് ഗോളോവിന്,ചെറിഷേവ് എന്നിവര് ഒരോ ഗോള് വീതം നേടി.ഈ ജയത്തോടെ റഷ്യ ബെല്ജിയത്തിനും ഇറ്റലിക്കും പുറകേ യൂറോ2020ക്ക് യോഗ്യത നേടി.
മറ്റൊരു മത്സരത്തില് ജര്മ്മനി 3-0നാണ് എസ്റ്റോണിയയെ തോല്പിച്ചത്. എംറീ കാന് 14-ാം മിനിറ്റില് ചുവപ്പുകണ്ട് പുറത്തുപോയതോടെ ഉണര്ന്നുകളിച്ച ജര്മ്മനിക്കുവേണ്ടി രണ്ടാം പകുതിയിലാണ് മൂന്ന് ഗോളുകളും പിറന്നത്.51-ാം മിനിറ്റിലും 57-ാം മിനിറ്റിലും ഈക്കേ ഗുണ്ടോഗനും 71-ാം മിനിറ്റില് തിമോ വെര്നറും എസ്റ്റോണിയക്കെതിരെ ഗോളുകള് നേടി.