കൊല്ക്കത്ത: 2022 ലോകകപ്പ് യോഗ്യത റൗണ്ട് മത്സരത്തില് ബംഗ്ലാദേശിനെതിരെ ഇന്ത്യക്ക് സമനില. ആവേശകരമായ മത്സരത്തില് 88ാം മിനിറ്റില് ആദില് ഖാന് നേടിയ ഗോളാണ് ഇന്ത്യയെ തോല്വിയില് നിന്നും രക്ഷിച്ചത്. ഇതോടെ മത്സരം 1-1ന് സമനിലയില് കലാശിച്ചു.
ആദ്യ പകുതിയില് തന്നെ ബംഗ്ലാദേശ് ഇന്ത്യയെ ഞെട്ടിച്ചു. 42ാം മിനിറ്റില് സാദ് ഉദിന് നേടിയ ഗോളിലൂടെ ബംഗ്ലാദേശ് മുന്നിലെത്തി. ഇന്ത്യന് ഗോള് കീപ്പറിന്റെ പിഴവ് മുതലെടുത്ത സാദ് ഉദിന് ഗോള്വല ചലിപ്പിച്ചു. ഇടതു വിങില് നിന്നുള്ള ബംഗ്ലാദേശിന്റെ ഫ്രീകിക്ക് ക്ലിയര് ചെയ്യുന്നതില് ഇന്ത്യന് പ്രതിരോധത്തിനും ഗോളി ഗുര്പ്രീതിനും ഒരുപോലെ പിഴച്ചു. വലതു മൂലയിലൂടെ ഓടിക്കയറിയ സാദ് ഉദിന് മികച്ചൊരു ഹെഡ്ഡറിലൂടെയാണ് ഗോള് നേടിയത്.
ഇന്ത്യക്ക് നിരവധി അവസരങ്ങള് ലഭിച്ചിട്ടും ഗോള് മാത്രം അകന്നു നിന്നു. എന്നാല് ഗോള് വഴങ്ങിയതോടെ പരാജയം മുന്നില് കണ്ട ഇന്ത്യക്ക് കളി തീരാന് മിനിറ്റുകള് മാത്രം ബാക്കിയുള്ളപ്പോഴാണ് ആദില് ഖാന് രക്ഷകനായെത്തിയത്. ബ്രെന്ഡന് ഫെര്ണാണ്ടസിന്റെ കോര്ണര് കിക്കില് മനോഹരമായ ഹെഡ്ഡറിലൂടെയാണ് ആദില് ഗോള് നേടിയത്. ഗോളിനു പുറമെ, രണ്ടാം പകുതിയില് ഗോള്ലൈന് ക്ലിയറന്സ് നടത്തിയും ആദില് ഇന്ത്യയെ രക്ഷിച്ചിരുന്നു.
