ബംഗുളൂരു: ശക്തരായ ആന്ധ്രക്കെതിരെ കേരളത്തിന് ആറു വിക്കറ്റ് ജയം. നിശ്ചിത 50 ഓവറില് ആന്ധ്രയുടെ 230 റണ്സ് വിജയലക്ഷ്യം 40-ാം ഓവറില് വെറും 4 വിക്കറ്റ് നഷ്ടത്തില് കേരളം മറികടന്നു.89 പന്തുകളില് 139 റണ്സ് നേടിയ വിഷ്ണു വിനോദാണ് കേരളത്തിന്റെ വിജയശില്പ്പി.
ടോസ് നേടി ബാറ്റിംഗിനിറങ്ങിയ ആന്ധ്ര ശ്രദ്ധിച്ചാണ് ബാറ്റിംഗ് തുടങ്ങിയത്. എന്നാല് 60 റണ്സിനിടെ ആദ്യ മൂന്നുപേരെ ബേസില് തമ്പിയും മിഥുനും ജലജും ചേര്ന്ന് മടക്കി.എന്നാല് മധ്യനിരയില് ക്യാപ്റ്റന് റിക്കി ബുഹിയുടെ 58 റണ്സും കരന് ഷിന്ഡേയുടെ 38 റണ്സുമാണ് ആന്ധ്രയ്ക്ക് ഭേദപ്പെട്ട സ്ക്കോര് നേടിക്കൊടുത്തത്.കേരളത്തിന് വേണ്ടി ബേസില് തമ്പിയും മിഥുനും 2 വിക്കറ്റുകള് വീതം വീഴ്ത്തി.
മറുപടി ബാറ്റിംഗിനിറങ്ങിയ കേരളത്തെ തുടക്കത്തിലെ തന്നെ ആന്ധ്ര ബൗളര്മാര് ഞെട്ടിച്ചു. സ്കോര് ബോര്ഡില് ഒറ്റ റണ് മാത്രം നില്ക്കേ ഒരു റണ്സ് എടുത്ത ക്യാപ്റ്റന് റോബിന് ഉത്തപ്പയെയും കഴിഞ്ഞ കളിയിലെ ഇരട്ട സെഞ്ച്വറി നേടിയ സഞ്ചു വി സാംസണെയും ഗിരിനാഥ് റെഡ്ഡി മടക്കി. തകര്ത്തടിച്ച വിഷ്ണു വിനോദും സച്ചിന് ബേബിയും സക്കോര് ചലിപ്പിച്ചു.19 റണ്സ് എടുത്ത സച്ചിനുശേഷമെത്തിയ ജലജ് സക്സേന(46) വിഷ്ണുവിന് കരുത്തായി. 89 പന്തില് 9 സിക്സറും 13 ഫോറുമടക്കമാണ് വിഷ്ണു 139 റണ്സ് നേടിയത്. ആന്ധ്രയുടെ പ്രതീക്ഷകളെ ഇരുവരും തകര്ത്തു. റെഡ്ഡിക്കുമുന്നില്ത്തന്നെ വിഷ്ണു വീണെങ്കിലും രാഹുല്(27)പുറത്താകാതെ നിന്നുകൊണ്ട് ജലജ് സക്സേനക്കൊപ്പം കേരളത്തിന് ജയം സമ്മാനിച്ചു. ആന്ധയ്ക്ക് വേണ്ടി കിരണ് റെഡ്ഡി 3 വിക്കറ്റുകളും നരേന് റെഡ്ഡി ഒരു വിക്കറ്റും വീഴ്ത്തി.