റാഞ്ചി: ദക്ഷിണാഫ്രിക്കക്കെതിരായ മൂന്നാം ടെസ്റ്റില്‍ ഇന്ത്യ കുതിക്കുന്നു. രണ്ടാം ദിനമായ ഇന്ന് രോഹിത്ത് ശര്‍മ്മ കരിയറിലെ ആദ്യ ഇരട്ട സെഞ്ച്വറി കുറിച്ചു. സിക്‌സറോടെ സെഞ്ച്വറി കുറിച്ച രോഹിത് ഇരട്ട സെഞ്ച്വറി കുറിച്ചതും സിക്‌സറിലൂടെയാണ്. 249 പന്തിലാണ് രോഹിത് ഇരട്ട സെഞ്ച്വറി നേടിയത്.
രോഹിത്തിന് പിന്നാലെ അജിങ്ക്യ രഹാനെ സെഞ്ച്വറി കുറിച്ചതോടെ ഇന്ത്യ മികച്ച സ്‌കോറാണ് ലക്ഷ്യമിടുന്നത്. ഒടുവില്‍ വിവരം ലഭിക്കുമ്പോള്‍ ഇന്ത്യ 4 വിക്കറ്റ് നഷ്ടത്തില്‍ 370 റണ്‍സ് നേടിയിട്ടുണ്ട്. 211 റണ്‍സുമായി ഓപ്പണര്‍ രോഹിത് ശര്‍മ്മയും 15 റണ്‍സുമായി രവീന്ദ്ര ജഡേജയുമാണ് ക്രീസില്‍.
ആദ്യ ദിനമായ ഇന്നലെ വെളിച്ചക്കുറവ് മൂലം മത്സരം നേരത്തെ അവസാനിപ്പിച്ചപ്പോള്‍ ഇന്ത്യ 3 വിക്കറ്റ് നഷ്ടത്തില്‍ 224 റണ്‍സെന്ന നിലയിലായിരുന്നു. തുടര്‍ന്ന് ഇന്ന് കളി ആരംഭിച്ചപ്പോള്‍ അജിങ്ക്യ രഹാനെ തന്റെ കരിയറിലെ 11ാം സെഞ്ച്വറി കുറിച്ചു. രോഹിത്തിനൊപ്പം 267 റണ്‍സിന്റെ അപരാജിത കൂട്ടുകെട്ട് പടുത്തുയര്‍ത്തിയ ശേഷമാണ് രഹാനെ (116) മടങ്ങിയത്. ഇതിനു പിന്നാലെ രോഹിത്ത് ശര്‍മ്മ തന്റെ ടെസ്റ്റ് കരിയറിലെ ആദ്യ ഇരട്ട സെഞ്ച്വറിയാണ് നേടിയത്. 243 പന്തില്‍ 28 ബൗണ്ടറികളും 4 സിക്‌സറുകളുമാണ് ഹിറ്റ്മാന്റെ ബാറ്റില്‍ നിന്ന് പിറന്നത്.
മൂന്നാം ടെസ്റ്റിലും സെഞ്ച്വറി നേടിയതോടെ രോഹിത് മുന്‍ ഇന്ത്യന്‍ താരം സുനില്‍ ഗവാസ്‌കറിന്റെ റെക്കോര്‍ഡിനൊപ്പമെത്തിയിരന്നു. ഏറെ നാളത്തെ കാത്തിരിപ്പിനു ശേഷം ഇന്ത്യയുടെ ടെസ്റ്റ് ഓപ്പണറായി സ്ഥാനക്കയറ്റം ലഭിച്ചതോടെ മികച്ച ഫോമിലാണ് രോഹിത്. ആദ്യ ടെസ്റ്റിന്റെ രണ്ട് ഇന്നിംഗ്സുകളിലും സെഞ്ച്വറി നേടിയ താരം റാഞ്ചിയിലും മൂന്നക്കം കടന്നതോടെ ഒരു ടെസ്റ്റ് പരമ്പരയില്‍ മൂന്നോ അതിലധികമോ സെഞ്ച്വറി നേടുന്ന രണ്ടാമത്തെ ഓപ്പണറായി രോഹിത് മാറി.
