റാഞ്ചി: വീരേന്ദര്‍ സേവാഗ് എന്ന നിര്‍ഭയനായ ഇന്ത്യന്‍ ഓപ്പണര്‍ വിരമിച്ചതിനു ശേഷം ഒഴിഞ്ഞു കിടന്ന സിംഹാസനത്തിലേക്ക് അപ്രതീക്ഷിതമായി കടന്നുവന്നയാളാണ് രോഹിത് ശര്‍മ്മ. എതിര്‍ ടീമിന്റെ ബൗളര്‍മാരെ നിര്‍ദാക്ഷിണ്യം പ്രഹരിച്ചിരുന്ന സേവാഗിന്റെ വിരമിക്കല്‍ ഇന്ത്യന്‍ ടീമിന് വലിയ നഷ്ടം തന്നെയായിരുന്നു. എന്നാല്‍ ഓരോ മത്സരം കഴിയുമ്പോഴും സേവാഗ് എന്ന പ്രതിഭയോട് സാദൃശ്യപ്പെടുത്താവുന്ന പ്രകടനമാണ് രോഹിത് പുറത്തെടുക്കുന്നത്.
സേവാഗിന്റെ ജന്മദിനമായ ഇന്ന് റാഞ്ചിയില്‍ നടക്കുന്ന ഇന്ത്യ-ദക്ഷിണാഫ്രിക്ക മത്സരത്തില്‍ രോഹിത് ശര്‍മ്മ ഇരട്ട സെഞ്ച്വറി കുറിച്ചിരുന്നു. 255 പന്തുകള്‍ നേരിട്ട രോഹിത് 28 ബൗണ്ടറികളും 6 സിക്‌സറുകളുമുള്‍പ്പെടെ 212 റണ്‍സാണ് നേടിയത്. ലുന്‍ഗി എന്‍ഗിഡിയുടെ പന്തില്‍ സിക്‌സര്‍ പറത്തി അദ്ദേഹം ഇരട്ട സെഞ്ച്വറി കുറിച്ചപ്പോള്‍ ‘സേവാഗിന്റെ പിറന്നാള്‍ ദിനത്തില്‍ ഇതിലും മനോഹരമായ ആദരം നല്‍കാന്‍ സാധിക്കില്ല’ എന്ന് കമന്റേറ്റര്‍മാര്‍ വരെ പറഞ്ഞുപോയിരുന്നു. സികസര്‍ അടിച്ചാണ് സേവാഗ് തന്റെ ആദ്യ ട്രിപ്പിള്‍ സെഞ്ച്വറി കുറിച്ചിരുന്നത്.
മികച്ച ഫോം തുടരുന്ന രോഹിത് ഇതിനോടകം നിരവധി റെക്കോര്‍ഡുകളും തിരുത്തിക്കുറിച്ചു കഴിഞ്ഞു. ഒരു ടെസ്റ്റ് പരമ്പരയില്‍ 500ലധികം റണ്‍സ് നേടുന്ന അഞ്ചാമത്തെ മാത്രം ഇന്ത്യന്‍ താരമാണ് രോഹിത് ശര്‍മ്മ. സുനില്‍ ഗവാസ്‌കര്‍, വീരേന്ദര്‍ സേവാഗ്, വിനോദ് മങ്കാദ്, ബുധി കുന്ദെരന്‍ എന്നിവരാണ് രോഹിത്തിന് മുന്‍പ് ഈ നേട്ടം സ്വന്തമാക്കിയത്.
ക്രിക്കറ്റ് ചരിത്രത്തില്‍ ടെസ്റ്റിലും ഏകദിന മത്സരങ്ങളിലും സച്ചിന്‍, സേവാഗ്, ക്രിസ് ഗെയ്ല്‍ എന്നിവര്‍ക്കു ശേഷം ഇരട്ട സെഞ്ച്വറി നേടുന്ന നാലാമത്തെ താരമാണ് രോഹിത്. ഏകദിനത്തില്‍ 3 ഇരട്ട സെഞ്ച്വറികള്‍ അദ്ദേഹം നേടിയിട്ടുണ്ട്.
ഒരു ടെസ്റ്റ് പരമ്പരയില്‍ ഏറ്റവും കൂടുതല്‍ സിക്‌സറുകള്‍ നേടിയ താരമെന്ന റെക്കോര്‍ഡും രോഹിത്തിനെ തേടിയെത്തി. മൂന്നാം ടെസ്റ്റില്‍ ഒരു ഇന്നിംഗ്‌സ് കൂടി ബാക്കി നില്‍ക്കെ 19 സിക്‌സറുകളാണ് രോഹിത്തിന്റെ ബാറ്റില്‍ നിന്നും പിറന്നത്.
ആദ്യ ടെസ്റ്റിന്റെ രണ്ട് ഇന്നിംഗ്‌സുകളിലും സെഞ്ച്വറി നേടിയ താരം റാഞ്ചിയിലും മൂന്നക്കം കടന്നതോടെ ഒരു ടെസ്റ്റ് പരമ്പരയില്‍ മൂന്നോ അതിലധികമോ സെഞ്ച്വറി നേടുന്ന രണ്ടാമത്തെ ഓപ്പണറായി രോഹിത് മാറിയിരുന്നു. മുന്‍ ഇന്ത്യന്‍ താരം സുനില്‍ ഗവാസ്‌കറിന്റെ റെക്കോര്‍ഡിനൊപ്പമാണ് രോഹിത് ശര്‍മ്മയുടെ പേരും എഴുതിച്ചേര്‍ത്തിരിക്കുന്നത്.
