ബംഗളൂരു: വിജയ് ഹസാരെ ട്രോഫിയില്‍ കര്‍ണ്ണാടക ചാമ്പ്യന്‍മാര്‍. മഴ തടസപ്പെടുത്തിയ മത്സരത്തില്‍ വിജെഡി നിയമപ്രകാരമാണ് കര്‍ണ്ണാടകയെ വിജയികളായി പ്രഖ്യാപിച്ചത്. ആദ്യം ബാറ്റ് ചെയ്ത തമിഴ്‌നാട് 49.5 ഓവറില്‍ 252 റണ്‍സിന് ഓള്‍ ഔട്ടായി. മറുപടി ബാറ്റിംഗില്‍ കര്‍ണ്ണാടക 23 ഓവറില്‍ 1 വിക്കറ്റ് നഷ്ടത്തില്‍ 146 റണ്‍സെടുത്തു നില്‍ക്കെയാണ് മഴ കളി തടസപ്പെടുത്തിയത്.
55 പന്തില്‍ പുറത്താകാതെ 69 റണ്‍സെടുത്ത മായങ്ക് അഗര്‍വാളിന്റെയും 52 റണ്‍സുമായി പുറത്താകാതെ നിന്ന ലോകേഷ് രാഹുലിന്റെയും പ്രകടനമാണ് കര്‍ണ്ണാടകയുടെ വിജയത്തില്‍ നിര്‍ണ്ണായകമായത്. ബോളിംഗില്‍ 34 റണ്‍സ് വഴങ്ങി 5 വിക്കറ്റ് നേടിയ അഭിമന്യു മിഥുന്‍ തിളങ്ങിയതോടെ തമിഴ്‌നാട് ഇന്നിംഗ്‌സ് 252 റണ്‍സില്‍ അവസാനിച്ചു. ഇതോടെ വിജയ് ഹസാരെ ട്രോഫിയില്‍ കര്‍ണ്ണാടക നാലാം തവണയും ജേതാക്കളായി.
നേരത്തെ, ആദ്യം ബാറ്റ് ചെയ്ത തമിഴ്‌നാടിനായി അഭിനവ് മുകുന്ദും ബാബാ അപരാജിതും മികച്ച പ്രകടനമാണ് കാഴ്ചവെച്ചത്. അഭിനവ് മുകുന്ദ് 85 റണ്‍സും ബാബാ അപരാജിത് 66 റണ്‍സും നേടി.
