കൊച്ചി: ഹീറോ ഐഎസ്എല് 2018-19 എമര്ജിംഗ് പ്ലെയര് ഓഫ് സീസണ് പുരസ്കാരം സ്വന്തമാക്കിയ ആരാധകരുടെ പ്രിയങ്കരനായ സഹല് അബ്ദുള് സമദിനെ കളിക്കാന് കോച്ച് അനുവദിക്കാത്തത് ബ്ലാസ്റ്റേഴ്സ് ആരാധകര്ക്കിടയില് ഏറ്റവും വലിയ സംസാരവിഷയമാണ്. സഹല് ഇതുവരെ മൂന്ന് മത്സരങ്ങളില് 78 മിനിറ്റ് മാത്രമാണ് കളിച്ചത്. ഇത് ബ്ലാസ്റ്റേഴ്സ് കോച്ച് എല്ക്കോ ഷട്ടോരി സഹലില് തൃപ്തനല്ലെന്ന അഭ്യൂഹങ്ങള്ക്ക് കാരണമായി. ഇക്കാര്യത്തില് ശക്തമായ ഭാഷയിലാണ് അദ്ദേഹം പ്രതികരിച്ചത്.
”ഞാന് എല്ലായ്പ്പോഴും കഴിവുകളെ പിന്തുണയ്ക്കും. ഹെഡ് കോച്ച് സഹലിനെ ഇഷ്ടപ്പെടുന്നില്ലെന്ന് ചില ആളുകള് കരുതുന്നു. അദ്ദേഹത്തെ എന്റെ ടീമില് ഉള്പ്പെടുത്തിയതില് ഞാന് വളരെ സന്തുഷ്ടനാണ്. എന്നാല് ഞങ്ങള് യാഥാര്ത്ഥ്യത്തിലേക്ക് നോക്കരുതെന്ന് ഇതിനര്ത്ഥമില്ല. അബുദാബിയിലോ ദുബായിലോ ഉള്ള ഒരു ഫുട്ബോള് സ്കൂളില് നിന്നാണ് സഹല് വരുന്നത്. ഇതിന് മുമ്പ് തന്റെ ജീവിതത്തില് ഒരിക്കലും അദ്ദേഹം മത്സര ഫുട്ബോള് കളിച്ചിട്ടില്ല. അദ്ദേഹത്തിന് അതിശയകരമായ കഴിവുണ്ട്, അവനെപ്പോലൊരാളെ ടീമിന്റെ സിസ്റ്റത്തിലേക്ക് ഉള്പ്പെടുത്താന് സമയമെടുക്കും’. ഷട്ടോരി പറഞ്ഞു.
ചെറിയ കാര്യങ്ങള് വരെ ഒരു മത്സരത്തില് വളരെയേറെ പ്രാധാന്യമര്ഹിക്കുന്നു. ഞാന് ഇക്കാര്യങ്ങള് സഹലുമായി ചര്ച്ച ചെയ്തിട്ടുണ്ട്. ഞാന് അദ്ദേഹത്തെ വിമര്ശിക്കുന്നതല്ല. ഞാന് എപ്പോഴും കഴിവുകള് പരീക്ഷിക്കുകയും ഉത്തേജിപ്പിക്കുകയും ചെയ്യുന്ന ആളാണ്. ഞാന് അദ്ദേഹത്തെ വിശ്വസിക്കുന്നില്ലെന്ന് കരുതുന്ന ഒരു കളിക്കാരനും ടീമില് ഇല്ല, ”അദ്ദേഹം വിശദീകരിച്ചു.
തോല്വി വഴങ്ങിയ കളികളില് നഷ്ടം സംഭവിച്ചത് ഭൂരിഭാഗവും സെറ്റ് പീസുകളില് നിന്നാണ്. ടീമിനെ ബാധിക്കുന്ന പരിക്കുകള് സംബന്ധിക്കുന്ന ആശങ്കകള് കോച്ച് ഉയര്ത്തികാട്ടിയതോടൊപ്പം അടുത്ത മത്സരത്തിലൂടെ തിരിച്ചുവരേണ്ടതിന്റെ പ്രാധാന്യവും അദ്ദേഹം വ്യക്തമാക്കി. ഇന്ന് രാത്രി 7.30ന് ഹോം ഗ്രൗണ്ടായ ജവഹര്ലാല് നെഹ്റു അന്താരാഷ്ട്ര സ്റ്റേഡിയത്തില് ബ്ലാസ്റ്റേഴ്സ് ഇറങ്ങുമ്പോള് ഒഡീഷയാണ് എതിരാളികള്.