ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്ററിനെ മുന്നേറാന്‍ വിടാതെ ഷെഫ് യുണൈറ്റഡ് സമനില പിടിച്ചു. 3-3നാണ് ഇരുടീമുകളും വീറും വാശിയും നിറഞ്ഞ മത്സരത്തിന് ശേഷം പിരിഞ്ഞത്.തുടക്കം മുതല്‍ ആക്രമിച്ച് കളിച്ച ഷെഫ്, മാഞ്ചസ്റ്റര്‍ യുണൈറ്റഡിന്റെ വല ചലിപ്പിച്ചു. ആദ്യ പകുതിയുടെ 19-ാം മിനിറ്റില്‍ ജോണ്‍ ഫ്‌ലെക്കും രണ്ടാം പകുതിയുടെ 52-ാം മിനിറ്റില്‍ ലിസ് മൗസ്സെറ്റിലും ഗോള്‍ നേടിയാണ് ചെമ്പടയെ ഞെട്ടിച്ചത്. 2-0ന് പുറകിലായ മാഞ്ചസ്റ്റര്‍ ഉണര്‍ന്നത് 3 ഗോളുകള്‍ പുറകേ പുറകേ തിരിച്ചടിച്ചാണ്.
ഷെഫിന്റെ പ്രതിരോധത്തെ തകര്‍ത്തെറിഞ്ഞ് 72-ാം മിനിറ്റില്‍ ബ്രാന്‍ഡന്‍ വില്ല്യംസും 77-ാം മിനിറ്റില്‍ മാസണ്‍ ഗ്രീന്‍വുഡും 79-ാം മിനിറ്റില്‍ മാര്‍ക്കസ് റാഷ്‌ഫോഡും ചെമ്പടക്കായി വല നിറച്ചു. എന്നാല്‍ അവസാനനിമിഷത്തില്‍ പന്തുമായി കുതിച്ച ഒലി മാക്ബ്രൗണിയുടെ ഉശിരന്‍ ഗോളിലൂടെ മാഞ്ചസ്റ്ററിന്റെ ജയപ്രതീക്ഷ ഷെഫ് യുണൈറ്റഡ് കെടുത്തി.
ശനിയാഴ്ച നടന്ന മത്സരങ്ങളില്‍ ആഴ്‌സണല്‍ സതാംപ്ടണ്‍ മത്സരം 2-2ന് പിരിഞ്ഞപ്പോള്‍ ചെല്‍സിയെ 2-1ന് തോല്‍പ്പിച്ച് മാഞ്ചസ്റ്റര്‍ സിറ്റിയും ബ്രൈറ്റണെ എതിരില്ലാത്ത രണ്ടു ഗോളുകള്‍ക്ക് തകര്‍ത്ത് ലിസെസ്റ്റര്‍ സിറ്റിയും വിജയം നേടി. കളികളുടെ 13-ാം ദിനം കഴിഞ്ഞപ്പോള്‍ മാഞ്ചസ്റ്റര്‍ 17 പോയിന്റുകളുമായി 9-ാം സ്ഥാനത്താണുള്ളത്. സിറ്റി 28 പോയിന്റുകളുമായി മൂന്നാം സ്ഥാനത്തും ചെല്‍സി 28 പോയിന്റുകളുമായി നാലാം സ്ഥാനത്തുമാണ്.ലിവര്‍പ്പൂളാണ് നിലവില്‍ ഒന്നാമതും ലിസസ്റ്റര്‍ സിറ്റി രണ്ടാമതായും തുടരുകയാണ്.
