അണലി, മൂര്ഖന്, രാജവെമ്പാല, ശംഖുവരയന് എന്നിവയാണ് പ്രധാനമായും കേരളത്തില് കണ്ടു വരുന്ന വിഷ പാമ്പുകള്. രണ്ട് രീതിയിലാണ് പാമ്പിന്റെ വിഷം മനുഷ്യ ശരീരത്തെ ബാധിക്കുന്നത്. ശംഖുവരയന്, മൂര്ഖന്, രാജവെമ്പാല എന്നിവയുടെ വിഷം നാഡീമണ്ഡലത്തെയാണ് ബാധിക്കുന്നത്. എന്നാല് അണലിയുടെ വിഷം ബാധിക്കുന്നത് രക്തമണ്ഡലത്തെയാണ്.
നാഡീമണ്ഡലത്തെ ബാധിക്കുന്ന വിഷബാധയേറ്റാല് കാഴ്ച്ച മങ്ങല്, ശ്വാസ തടസം, ആമാശയ വേദന എന്നിവ ഉണ്ടാകും. രക്ത മണ്ഡലത്തെ ബാധിക്കുന്ന വിഷ ബാധ മൂലം തലകറക്കവും കടിയേറ്റ് ഭാഗത്ത് നീരും, രക്തച്ചൊരിച്ചിലും ഉണ്ടാകും.
മൂര്ഖന്
ഏറ്റവും അപകടകാരിയായ പാമ്പുകളില് ഒന്നാണ് മൂര്ഖന്. സര്പ്പം, പത്തിക്കാരന്, പുല്ലാനി എന്നീ പേരുകളിലും മൂര്ഖന് പാമ്പ് അറിയപ്പെടാറുണ്ട്. വലിയ വിഷപ്പല്ലുകളാണ് മൂര്ഖന് പാമ്പിനുള്ളത്. അതിനാല് തന്നെ മൂര്ഖന് വളരെ ആഴത്തില് മുറിവേല്പ്പിക്കാന് സാധിക്കും. ഒരു ജീവി മരിക്കാന് ആവശ്യമായ വിഷത്തിന്റെ അളവിനേക്കാള് പത്തിരട്ടി വിഷമാണ് മൂര്ഖന് പാമ്പ് കടിക്കുമ്പോള് ശരീരത്തിലേല്ക്കുന്നത്.
അണലി
വിഷപ്പാമ്പുകളുടെ ഗണത്തില് അപകടകാരിയായ മറ്റൊരു ഇനമാണ് അണലി. കേരളത്തില് പാമ്പു കടിയേറ്റുള്ള മരണങ്ങളില് 80 ശതമാനവും സംഭവിക്കുന്നത് അണലിയുടെ കടിയേറ്റാണ്. രക്ത ചംക്രമണ വ്യവസ്ഥയെയാണ് അണലി വിഷം ബാധിക്കുക. അണലിയുടെ കടിയേറ്റാല് കിഡ്നിയുടെ പ്രവര്ത്തനവും തടസപ്പെടും.
ശംഖുവരയന്
വളകൊഴുപ്പന്, മോതിരവളയന്, കരിയോല, വെള്ളിക്കെട്ടന് എന്നീ പേരുകളില് അറിയപ്പെടുന്ന പാമ്പാണ് ശംഖുവരയന്. നാഡീമണ്ഡലത്തെയാണ് ശംഖുവരയന്റെ വിഷം ബാധിക്കുന്നത്. വളരെ ചെറിയ വിഷപല്ലാണിതിന്. ശംഖുവരയന്റെ കടിയേറ്റാല് തളര്ച്ചയും, ക്ഷീണവും ഉണ്ടാകും. കടിയേറ്റ സ്ഥലത്ത് ഒരു തരം തണുപ്പും മരവിപ്പും ഉണ്ടാകും. പാമ്പുകളില് ഏറ്റവും വീര്യം കൂടിയ വിഷമുള്ള പാമ്പാണ് ശംഖുവരയന്.
രാജവെമ്പാല
കരയില് ജീവിക്കുന്ന ഏറ്റവും വലിപ്പമുള്ള വിഷപ്പാമ്പാണ് രാജവെമ്പാല. ഒറ്റക്കൊത്തില് ഒരു ശരാശരി മനുഷ്യനെ മുപ്പത് മിനുറ്റുകള്ക്കുള്ളില് കൊല്ലുവാനുള്ള കഴിവ് രാജവെമ്പാലയ്ക്കുണ്ട്. രാജവെമ്പാലയുടെ വിഷബാധ ഇരകളില് കലശലായ വേദനയും, കാഴ്ച മങ്ങലും, തലചുറ്റലും ഉണ്ടാക്കും. വിഷബാധയേറ്റാല് നിമിഷങ്ങള്ക്കുള്ളില് ഹൃദയത്തിന്റെ പ്രവര്ത്തനവും തകരാറിലാകും.
പാമ്പു കടിയേറ്റാല് ഉടന് ചെയ്യേണ്ടത്
പാമ്പു കടിയേറ്റവര് ഒരിക്കലും ഭയന്ന് ഓടരുത്. വിഷം പെട്ടെന്ന് ശരീരത്തില് വ്യാപിക്കാന് ഇത് കാരണമാകും. പാമ്പു കടിയേറ്റാല് പരിഭ്രമിക്കുകയും ചെയ്യരുത്. പാമ്പു കടിയേറ്റ ഭാഗത്തിന് മുകളില് തുണിയോ തോര്ത്തോ മുറിച്ച് കെട്ടണം. കടിയേറ്റ ഭാഗത്തെ വിഷം കലര്ന്ന രക്തം ഞെക്കി കളയുകയോ കീറി എടുക്കുകയോ ചെയ്യരുത്. പാമ്പു കടിയേറ്റ രോഗിയെ ഒരിക്കലും കിടത്തരുത്. രോഗിയെ എത്രയും വേഗം ASV (ആന്റി സ്നേക്ക് വെനം) ഉള്ള ആശുപത്രിയിലെത്തിക്കണം.