ക്ഷീരപഥത്തില് സൂര്യന്റെ എഴുപത് ഇരട്ടി ഭാരമുള്ള തമോഗര്ത്തം കണ്ടെത്തി. എല്ബി 1 എന്നാണ് തമോഗര്ത്തത്തിന് പേരിട്ടിരിക്കുന്നത്. ചൈനീസ് അക്കാദമി ഓഫ് സയന്സിലെ ഗവേഷകരാണ് തമോഗര്ത്തം കണ്ടെത്തിയത്. ലാമോസ്റ്റ് എന്ന സവിശേഷ ടെലസ്കോപ്പ് ഉപയോഗിച്ച് നടത്തിയ നിരീക്ഷണത്തിലാണ് എല് ബി 1 കണ്ടെത്തിയത്.
പ്രമുഖ ശാസ്ത്ര ജേണലായ നേച്ചറിലാണ് തമോഗര്ത്തം കണ്ടെത്തിയ വിവരം പ്രസിദ്ധീകരിച്ചത്. ക്ഷീരപഥത്തിലെ തമോഗര്ത്തങ്ങള് എല്ലാം സൂര്യനേക്കാള് 20 മടങ്ങോ അതില് കുറവോ ഭാരമുള്ളവയാണ്. ആദ്യമായാണ് ഇത്രയും ഭാരമുള്ള തമോഗര്ത്തം കണ്ടെത്തുന്നത്. പല തമോഗര്ത്തങ്ങള് ഒരുമിച്ച് ചേര്ന്നാകാം എല് ബി 1 രൂപം കൊണ്ടതെന്നാണ് ശാസ്ത്രജ്ഞരുടെ നിഗമനം.