ന്യൂഡല്ഹി: ഒരു മിനിറ്റിന് പോലും മണിക്കൂറുകളുടെ വിലയുണ്ട്. പാര്ലമെന്റിലെ ചോദ്യോത്തരവേളയില് പങ്കെടുക്കാന് ഓടിയെത്തി റെയില്വേ മന്ത്രി പീയൂഷ് ഗോയല്. പാലര്മെന്റിലേക്ക് ഓടിക്കയറുന്ന പീയൂഷ് ഗോയലിന്റെ ചിത്രങ്ങളാണ് ഇപ്പോള് സമൂഹമാധ്യമങ്ങളില് തരംഗമായിരിക്കുന്നത്.
കേന്ദ്രമന്ത്രിസഭാ യോഗത്തില് പങ്കെടുക്കേണ്ടതിനാല് പാര്ലമെന്റിലെ ചോദ്യോത്തര വേളയില് പങ്കെടുക്കാന് മന്ത്രി വൈകിയിരുന്നു. ഇതേ തുടര്ന്നാണ് സമയം പാഴാക്കാതെ മന്ത്രി പാര്ലമെന്റിലേക്ക് ഓടിയെത്തിയത്.
മന്ത്രി ഓടുന്ന ചിത്രങ്ങള് വൈറലായതോടെ തന്റെ ഉത്തരവാദിത്തം നിറവേറ്റുന്നതില് മന്ത്രി കാണിച്ച ആത്മാര്ത്ഥയില് പ്രശംസിച്ച് നിരവധി പേരാണ് സമൂഹമാദ്ധ്യമങ്ങളില് രംഗത്തെത്തിയിരിക്കുന്നത്. ഒരു കേന്ദ്രമന്ത്രി ഓടുന്നത് ഇതിനുമുമ്പ് ആരും കണ്ടിട്ടില്ലെന്ന തരത്തിലുള്ള കമന്റുകളും സമൂഹമാദ്ധ്യമങ്ങളില് നിറയുന്നുണ്ട്.
ലോക്സഭയിലും രാജ്യസഭയിലും ചോദ്യോത്തര വേള നടക്കുന്ന സമയത്ത് മന്ത്രിമാര് എത്തിച്ചേരാത്തതില് പ്രധാനമന്ത്രി അതൃപ്തി പ്രകടിപ്പിച്ചിരുന്നു. ഇക്കാര്യം പ്രധാനമന്ത്രി പാര്ലമെന്റ് യോഗത്തിന് മുന്പ് മന്ത്രിമരെ അറിയിച്ചിരുന്നു. ഈ അറിയിപ്പും മന്ത്രിയുടെ ഓട്ടവും കൂട്ടിവായിച്ച് പീയൂഷ് ഗോയലിന്റെ ഓട്ടത്തിന് കാരണം പ്രധാനമന്ത്രിയാണെന്നും ചിലര് ട്വീറ്റ് ചെയ്തു.