മുംബൈ: ഓള്‍റൗണ്ടര്‍ ഹാര്‍ദ്ദിക് പാണ്ഡ്യ ടീം ഇന്ത്യക്കൊപ്പം ചേരാന്‍ തയ്യാറെടുക്കുന്നു. ദക്ഷിണാഫ്രിക്കക്കെതിരെയായിരുന്നു അവസാനമായി കളിച്ചത്. കടുത്ത പുറം വേദനയെത്തുടര്‍ന്നുള്ള ശസ്ത്രക്രീയക്ക് ശേഷം മുംബൈയില്‍ പരിശീലനം തുടങ്ങി. നടക്കാനിരിക്കുന്ന ന്യൂസിലാന്റ് പര്യടനത്തില്‍ ടീമിന്റെ ഭാഗമാകുമെന്നാണ് വിവരം. 2020 ജനുവരി അവസാനമാണ് പര്യടനം.
സെപ്തംബറിലാണ് പലതവണ നീട്ടിയ ചികിത്സയെപ്പറ്റി ടീം ഫിസിയോ യോഗേഷ് പാര്‍മാരുമായി സംസാരിച്ചത്. കഴിഞ്ഞ ഏഷ്യാകപ്പിന്റെ സമയത്താണ് ശക്തമായ പുറം വേദന ആരംഭിച്ചത്. നട്ടെല്ലിന് താഴെ കടുത്ത പേശിമുറുക്കം വരാന്‍ തുടങ്ങിയതോടെ വിദേശത്ത് തന്നെ ശസ്ത്രക്രീയ നടത്താന്‍ ബിസിസിഐ അനുമതി കൊടുത്തതോടെ കാര്യങ്ങള്‍ വേഗത്തിലാക്കുകയായിരുന്നു.
ഐപിഎല്ലിലും 2020 ഒക്ടോബറില്‍ നടക്കാനിരിക്കുന്ന ടി20യിലും ഏറെ പ്രതീക്ഷയുള്ള താരമാണ് 26കാരനായ പാണ്ഡ്യ. ന്യൂസിലാന്റില്‍ 5 ടി20കളും 3 ഏകദിനങ്ങളും 2 ടെസ്റ്റുകളും ഇന്ത്യ കളിക്കും.
