ന്യൂഡല്ഹി : പ്രതിരോധ മേഖലയ്ക്ക് കരുത്തു പകരാന് പുതിയ അത്യാധുനിക ശേഷിയുള്ള മിസൈല് സംവിധാനം വികസിപ്പിച്ച് ഇന്ത്യ. ഇസ്രായേലുമായി ചേര്ന്നാണ് കപ്പല് വഴി വിക്ഷേപിക്കാവുന്ന വ്യോമ മിസൈല് സംവിധാനമായ ബാരക്ക്- എട്ട് വികസിപ്പിച്ചത്. ഇന്ത്യ ഇസ്രായേല് നാവികസേനകള് ഉപയോഗിക്കുന്ന ബാരക്ക്- 1 മിസൈലിനെ നവീകരിച്ചാണ് ബാരക്ക് -എട്ട് വികസിപ്പിച്ചിരിക്കുന്നത്.
ഇന്ത്യയുടെ ഡിഫന്സ് റിസര്ച്ച് ആന്റ് ഡെവലപ്മെന്റ് ഓര്ഗനൈസേഷന്, ഇസ്രായേലിന്റെ എയറോ സ്പേസ് ഇന്ഡസ്ട്രിസ്, അഡ്മിനിസ്ട്രേഷന് ഫോര് ദി ഡെവലപ്മെന്റ് ഓഫ് വെപ്പന്സ് ആന്റ് ടെക്നോളജിക്കല് ഇന്ഫ്രാസ്ട്രക്ചര്, റഫാല്, എല്റ്റ സിസ്റ്റം തുടങ്ങിയ കമ്പനികള് സംയുക്തമായാണ് ബാരക്ക് – എട്ട് രൂപകല്പ്പന ചെയ്തിരിക്കുന്നത്.
ആകാശ പാതയിലെ ഭീഷണികളെ ചെറുക്കാന് വളരെ ഫലപ്രദമാണ് ബാരക്ക്- എട്ട് മിസൈലുകള്. മള്ട്ടി മിഷന് റഡാറുകളും, ഫ്ളക്സിബിള് കണ്ട്രോള് ആന്റ് കമാന്റ് സിസ്റ്റം, ടു വേ ടാറ്റാ ലിങ്ക് എന്നിവയുള്ളതിനാല് ഏത് കാലാവസ്ഥയിലും രാത്രിയോ പകലോ വ്യത്യാസമില്ലാതെ ബാരക്ക് – എട്ട് പ്രയോഗിക്കാം.
ആളില്ലാ ഏരിയല് വാഹനങ്ങള്, ഹെലികോപ്റ്ററുകള്, വിമാനം, കപ്പല് വിരുദ്ധ മിസൈലുകള്, ബാലിസ്റ്റിക്, ക്രൂയിസ് മിസൈലുകള്, യുദ്ധ വിമാനങ്ങള് എന്നിവയെ ഫലപ്രദമായി പ്രതിരോധിക്കാനാകും എന്നതാണ് ബാരക്ക് എട്ടിന്റെ മറ്റൊരു പ്രത്യേകത.
മിനിറ്റില് നൂറ് കിലോമീറ്റര് ദൂരപരിധിയുള്ള ബാരക്ക് – എട്ട് മിസൈലിന് മൂന്ന് വകഭേദങ്ങളാണ് ഉള്ളത്. ബാരക്ക് – എട്ട് എഎംഡി/എല്ആര്എസ്എഎം, എംആര്എസ്എഎം, ബാരക്ക് എംഎക്സ് എന്നിവയാണ് ബരാക്ക് മിസൈലിന്റെ മൂന്ന് വകഭേദങ്ങള്.