കട്ടക്ക്: വെസ്റ്റ് ഇന്ഡീസിനെതിരായ മൂന്നാം ഏകദിനത്തിനുള്ള ടീമില് നിന്നും പേസര് ദീപക് ചഹറിനെ പരിക്കു മൂലം ഒഴിവാക്കി. പുറം വേദനയെ തുടര്ന്നാണ് ദീപക്കിനെ മാറ്റിയത്. പകരം ഡല്ഹിയുടെ പേസര് നവ്ദീപ് സെയ്നിയെ ടീമില് ഉള്പ്പെടുത്തി. മൂന്ന് മത്സര പരമ്പരയിലെ അവസാന മത്സരം ഞായറാഴ്ച കട്ടക്കില് നടക്കും.
അഞ്ച് ട്വന്റി 20 മത്സരങ്ങളില് സെയ്നി ഇന്ത്യയ്ക്കായി പന്തെറിഞ്ഞിട്ടുണ്ട്. ഒരോ മത്സരം വിജയിച്ച് ഇന്ത്യയും വിന്ഡീസും ഒപ്പത്തിനൊപ്പമെത്തിയതിനാല് മൂന്നാം മത്സരത്തിലെ വിജയികള്ക്ക് പരമ്പര നേടാം.
വെസ്റ്റ് ഇന്ഡീസിനെതിരായ രണ്ടാം ഏകദിനത്തില് ഇന്ത്യ107 റണ്സിന് വിജയിച്ചിരുന്നു. ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറില് 5 വിക്കറ്റ് നഷ്ടത്തില് 387 റണ്സ് നേടിയപ്പോള് വെസ്റ്റ് ഇന്ഡീസ് 43.3 ഓവറില് 280 റണ്സിന് എല്ലാവരും പുറത്തായി. ഇതോടെ പരമ്പരയില് ഇന്ത്യ വെസ്റ്റ് ഇന്ഡീസിനൊപ്പമെത്തിയിരുന്നു.
