ഹൈദരാബാദ്: ലോകചാമ്പ്യനായ ശേഷം സിന്ധു തന്നെ പരിഗണിച്ചില്ലെന്ന പരാതിയുമായി മുന്‍ കോച്ച് രംഗത്ത്. കൊറിയന്‍ താരമായിരുന്ന കിം ജി ഹ്യൂനാണ് സിന്ധു തന്നെ അവഗണിച്ചെന്ന രീതിയിലുള്ള പരാമര്‍ശം കൊറിയയിലെ ഒരു യൂട്യൂബ് ചാനലിന് നല്‍കിയത്. തനിക്ക് പരിശീലനത്തിനിടെ അസുഖം ബാധിച്ചിരുന്നെന്നും അതറിഞ്ഞിട്ടും സിന്ധു കാര്യം തിരക്കിയില്ലെന്നും കിം പറയുന്നു. ലോകചാമ്പ്യന്‍ ഷിപ്പ് നേടാന്‍ സഹായിച്ച തന്നെ മടങ്ങിപ്പോരാന്‍ നേരം സിന്ധു കൂടെക്കൂട്ടിയില്ലെന്നും കിം പരാതിയായി സൂചിപ്പിച്ചു.
എന്നാല്‍ കിമ്മിന്റെ പരാമര്‍ശങ്ങള്‍ക്കെതിരെ മറുപടിയുമായി സിന്ധുവിന്റെ അച്ഛനും മുന്‍ കായികതാരവുമായ രമണ രംഗത്തെത്തി. പരാമര്‍ശങ്ങള്‍ അടിസ്ഥാന രഹിതമാണെന്നും കിം പറയുന്നപോലെ ഹൃദയ ശൂന്യയല്ല തന്റെ മകളെന്നും രമണ പറഞ്ഞു. നിര്‍ണ്ണായകമായ ലോകചാമ്പ്യന്‍ഷിപ്പിന് തൊട്ടുമുമ്പുള്ള 9 ദിവസങ്ങളില്‍ കിം അപ്രത്യക്ഷയായി. അന്വേഷിച്ചപ്പോള്‍ ഭര്‍ത്താവിന്റെ ആരോഗ്യപ്രശ്‌നം കാരണം പോയതാണെന്നാണറിഞ്ഞത്. തുടര്‍ന്ന് ചാമ്പ്യന്‍ഷിപ്പ് വേദിയിലേക്ക് നേരിട്ടാണെത്തിയത്. മത്സരം കഴിഞ്ഞപ്പോഴും അതുപോലെ തന്നെ ഉടന്‍ മടങ്ങി. അതിലധികം മറ്റ് കാര്യങ്ങളിറിയില്ല, രമണ വ്യക്തമാക്കി.
കിം എന്നാല്‍ സിന്ധുവിനെ പരിശീലിപ്പിക്കുന്നതിനിടെ തന്നെ തായ് വാനിലെ ഒരു ക്ലബ്ബുമായി കരാര്‍ ഉറപ്പിച്ചിരുന്നതായും അറിയാന്‍ കഴിഞ്ഞതായി രമണ പറഞ്ഞു.
