ന്യൂഡല്ഹി: മറ്റുള്ളവരില് നിന്നും ബഹുമാനം ആഗ്രഹിക്കുന്നവര് ആദ്യം മറ്റുള്ളവരെ ബഹുമാനിക്കാന് പഠിക്കണമെന്ന് മേരി കോം. ഒളിമ്പിക്സ് യോഗ്യതാ പോരാട്ടത്തിന് യോഗ്യത നേടാനുള്ള മത്സരത്തില് വിജയിയായ ശേഷം എതിരാളിക്ക് കൈ കൊടുക്കാന് തയ്യാറാകാതിരുന്ന നടപടിയില് പ്രതികരിക്കുകയായിരുന്നു മേരി കോം.
താന് എന്തിനാണ് സെറീനുമായി കൈകുലുക്കേണ്ടത്. മറ്റുള്ളവര് തന്നെ ബഹുമാനിക്കണമെന്ന് ആഗ്രഹിക്കുന്നുവെങ്കില് ആദ്യം അവള് മറ്റുള്ളവരെ ബഹുമാനിക്കണം. ഇത്തരം സ്വഭാവവമുള്ളവരെ എനിക്ക് ഇഷ്ടമല്ല. ഇടിക്കൂട്ടിനകത്താണ് മികവ് കാട്ടേണ്ടത്. അല്ലാതെ പുറത്തല്ലെന്നും മേരി കോം വ്യക്തമാക്കി.
ഒളിമ്പിക്സ് യോഗ്യതാ മത്സരം കളിക്കാതെ നേരിട്ട് മേരികോമിന് അനുമതി നല്കാനായിരുന്നു ബോക്സിംഗ് ഫെഡറേഷന് നേരത്തെ തീരുമാനിച്ചത്. എന്നാല് സെറീന് ഇതിനെതിരെ രംഗത്തെത്തിയതോടെയാണ് ട്രയല്സ് വേണ്ടിവന്നത്. ഇന്ത്യയില് നിന്നുള്ള യോഗ്യതക്കായി മത്സരിക്കാന് തയ്യാറാണെന്ന് പിന്നീട് മേരി കോം ഫെഡറേഷനെ അറിയിക്കുകയായിരുന്നു. 51 കിലോ ഗ്രാം വിഭാഗത്തിലാണ് തന്നെ വെല്ലുവിളിച്ച നിഖാത് സെറീനെ മേരി കേം വീഴ്ത്തിയത്. 9-1 എന്ന വ്യത്യാസത്തിലാണ് മേരി കോം വിജയിച്ചത്.
