ന്യൂഡല്ഹി: ആദ്യ സംയുക്ത സൈനിക മേധാവിയായി ജനറല് ബിപിന് റാവത് ചുമതലയേറ്റു . പ്രതിരോധ മന്ത്രാലയത്തിന്റെ ആസ്ഥാനത്ത് ചുമതലയേല്ക്കും മുന്പ് ദേശീയ യുദ്ധ സ്മാരകത്തില് വീര സൈനികര്ക്ക് റാവത് പുഷ്പചക്രം സമര്പ്പിച്ചു. തുടര്ന്ന് മൂന്ന് സൈനിക വിഭാഗങ്ങളുടേയും സംയുക്ത ഗാര്ഡ് ഓഫ് ഓണറും സ്വീകരിച്ചതായി പ്രതിരോധമന്ത്രാലയം അറിയിച്ചു.
മൂന്ന് സേനാ വിഭാഗത്തേയും ഒരുമിച്ച് പ്രവര്ത്തിപ്പിക്കേണ്ട ചുമതലയാണ് തന്നില് നിക്ഷിപ്തമായിട്ടുള്ളത്. കരസേനയുടെ അതിര്ത്തി മേഖലയിലെ ശക്തമായ മുന്നേറ്റം, നാവികസേനയുടെ സമുദ്രമേഖലയിലെ വെല്ലുവിളികള്, വായുസേനയുടെ പുതിയ സംവിധാനങ്ങളുടെ ഫലപ്രദമായ ഉപയോഗം എന്നിവ കൃത്യമായി നിരീക്ഷിക്കുകയും സൈനികര്ക്ക് മികച്ച പരിശീലനം നല്കാനുമുള്ള സംവിധാനങ്ങളുടെ ഏകോപനവും ചെയ്യേണ്ടതുണ്ട്. പരമപ്രധാനമായി അനാവശ്യ ചിലവുകളൊഴിവാക്കിയുള്ള മികച്ച സൈനിക സംവിധാനം ഒരുക്കേണ്ടതും പ്രതിരോധ മന്ത്രാലയത്തിന് എല്ലാ സൈനിക വിഷയത്തിലും കൃത്യമായ വിവരങ്ങള് കൈമാറേണ്ടതുമുണ്ടെന്ന് ബിപിന് റാവത് അറിയിച്ചു.
രാഷ്ട്രീയവിഷയങ്ങളില് നിന്നും കൃത്യമായ ദൂരത്തിലാണ് സൈന്യം പ്രവര്ത്തിക്കുകയെന്നും ഭരിക്കുന്ന സര്ക്കാറിന്റെ നിര്ദ്ദേശമനുസരിച്ചാണ് സൈന്യം ഏതു കാര്യത്തിലും അന്തിമതീരുമാനമെടുക്കുകയെന്നും റാവത് വ്യക്തമാക്കി.
