തിരുവനന്തപുരം: പൗരത്വ ഭേദഗതി നിയമത്തിനെതിരെ മുഖ്യമന്ത്രി പിണറായി വിജയന്‍ നിയമസഭയില്‍ പാസാക്കിയ പ്രമേയത്തെ തള്ളി ഗവര്‍ണര്‍ ആരിഫ് മുഹമ്മദ് ഖാന്‍. പ്രമേയം ഭരണഘടനാ വിരുദ്ധമാണ്. പ്രമേയത്തിന് ഒരു നിയമ സാധുതയും ഭരണഘടനാ സാധുതയുമില്ലെന്നും ഗവര്‍ണര്‍ പറഞ്ഞു.
പൗരത്വ നിയമം പൂര്‍ണമായും കേന്ദ്ര വിഷയമാണ്. സംസ്ഥാനത്തിന് ഇക്കാര്യത്തില്‍ ഒന്നും ചെയ്യാനാവില്ല. സംസ്ഥാനത്തിന്റെ അധികാര പരിധിയിലുള്ള കാര്യത്തില്‍ മുഖ്യമന്ത്രി സമയം ചെലവഴിക്കണമെന്നും ഗവര്‍ണര്‍ കുറ്റപ്പെടുത്തി. കേരളത്തില്‍ അനധികൃത കുടിയേറ്റക്കാര്‍ ഇല്ലാത്തതിനാല്‍ പൗരത്വ ഭേദഗതി നിയമം കേരളത്തെ ഒരു തരത്തിലും ബാധിക്കില്ലെന്നും ഗവര്‍ണര്‍ കൂട്ടിച്ചേര്‍ത്തു.
അതേസമയം, ചരിത്ര കോണ്‍ഗ്രസിനിടെയുണ്ടായ പ്രതിഷേധം പോലീസിന്റെ അധികാര പരിധിയില്‍ വരുന്നതല്ല. സര്‍വകലാശാലാ സംഘാടകരാണ് ഇതില്‍ ഇടപെടേണ്ടത്. തെറ്റ് അതിര് കടന്നാല്‍ ചാന്‍സിലര്‍ എന്ന നിലയില്‍ ഇടപെടുമെന്നും ഗവര്‍ണര്‍ വ്യക്തമാക്കി.
