ന്യൂഡല്ഹി: സംയുക്തസേനാ വിഭാഗത്തിന്റെ ശക്തമായ വ്യോമസംവിധാനത്തിനായി പ്രത്യേക കമാന്റ് ഉണ്ടാക്കാനുള്ള നിര്ദ്ദേശം സംയുക്ത സേനാ മേധാവി(സിഡിഎസ്) ജനറല് ബിപിന് റാവത് നല്കി. ഹെഡ്ക്വാര്ട്ടേഴ്സ് ഇന്റഗ്രേറ്റഡ് ഡിഫന്സ് സ്റ്റാഫ്(ഐഡിഎസ്) വിഭാഗത്തിനുള്ള ആദ്യ നിര്ദ്ദേശമാണ് നല്കിയത്.
മൂന്നു സേനകളേയും സംയോജിപ്പിക്കുന്ന പ്രത്യേക വ്യോമസൈനിക വ്യൂഹത്തിനായുള്ള കേന്ദ്രം സജ്ജമാക്കാനൊരുങ്ങുകയാണ് പ്രതിരോധവിഭാഗം. ജൂണ് 30നുള്ളില് കേന്ദ്രം സജ്ജമാക്കാനുള്ള നിര്ദ്ദേശമാണ് റാവത് നല്കിയിരിക്കുന്നതെന്ന് പ്രതിരോധ മന്ത്രാലയം വക്താവ് അറിയിച്ചു.
മുഴുവന് സേനാ വിഭാഗങ്ങളുടെ കേന്ദ്രങ്ങളും ആയുധശാലകളും ആകാശസുരക്ഷാ സംവിധാനത്തിലൂടെ പ്രതിരോധമറതീര്ക്കലാണ് ലക്ഷ്യം. ഇതിനായി മൂന്ന് സേനകളുടേയും വ്യോമവിഭാഗത്തെ ഏകോപിപ്പിക്കുന്ന പ്രത്യേക ദൗത്യം ഇനി പുതിയ സംവിധാനമായ വ്യോമ പ്രതിരോധ വിഭാഗം നിര്വ്വഹിക്കും.2001ല് രൂപികരിക്കപ്പെട്ടതാണ് ഐഡിഎസ് എന്ന സംയുക്ത സംവിധാനം. പുതിയ സൈനിക മേധാവിയുടെ കീഴില് ഇനി ഐഡിഎസ് പ്രവര്ത്തിക്കുമെന്ന് പ്രതിരോധ മന്ത്രാലയം അറിയിച്ചു.
പുതിയ കേന്ദ്രത്തിന്റെയും സംയുക്ത വ്യോമ കമാന്റിന്റേയും നിര്വ്വഹണം വേഗത്തിലാക്കാന് 6 അംഗ സൈനിക ഉദ്യോഗസ്ഥരുടെ ഒരു സംഘത്തെ തീരുമാനിച്ചു കഴിഞ്ഞു. ഇതില് മൂന്ന് സേനകളിലേയും ഓപ്പറേഷന്, പ്ലാനിംഗ്,ട്രെയിനിംഗ്, ഇന്റലിജന്സ് വിഭാഗത്തിലെ ഏറ്റവും മുതിര്ന്ന ഉദ്യോഗസ്ഥരേയാണ് ഉള്പ്പെടുത്തിയിട്ടുള്ളത്.
